Kryetari i Partisë Demokratike, Sali Berisha, ka shpallur një vizion ambicioz për sektorin energjetik të Shqipërisë, duke premtuar një “bum të madh energjetik” bazuar në burimet e rinovueshme.
Gjatë një deklarate për mediat, Berisha theksoi se energjia nga era, dielli dhe gazi do të dyfishojë prodhimin aktual brenda mandatit të ardhshëm, duke e kthyer Shqipërinë në një nyje kryesore energjetike në rajon.
Sipas tij, vendi ka potencial të jashtëzakonshëm për prodhimin e energjisë eolike dhe solare, ndërsa hidrocentralet e vogla do të ndihmojnë komunitetet lokale të prodhojnë energji falas.
Berisha siguroi qytetarët se investimet në këtë sektor do të sjellin përfitime të drejtpërdrejta për ekonominë dhe biznesin shqiptar. Ai gjithashtu përmendi planet për ndërtimin e termocentraleve të gazit në përputhje me standardet mjedisore, duke shfrytëzuar kapacitetet e gazsjellësit TAP.
“Energjia do të ndryshojë jetën e shqiptarëve dhe do ta bëjë Shqipërinë një superfuqi rajonale,” përfundoi Berisha.
“Shqipëria madhështore do të jetë Shqipëria e bumit të madh energjetik, do të jetë Shqipëria e investimeve në energjetikë. Unë jam këtu për të garantuar shqiptarët se prodhimi i energjisë nga era, dielli dhe gazi me përparësi absolute energjinë e rinovueshme do të dyfishojë prodhimin total të sotëm gjatë mandatit që vjen. Parqet eolike, solare do të marrin përparësi absolute. Shqipëria ka ndër platformat e erës më të fuqishme në Evropë. Këto platforma shtrihen nga thellësitë e alpeve në jug. Zona të mëdha mund të prodhojnë mijëra megavatë në energji eolike. Por dielli është një burim i pashtershëm dhe unë garantoj qytetarët shqiptarë se Shqipërinë do ta shndërrojmë në vendin më tërheqës në Evropë për investimet në energji. Përfituesit më të mëdhenj të këtij bumi do të jenë qytetarët shqiptarë dhe biznesi shqiptar. Do të përdoren të gjitha potencialet ujore në përputhje me rregullat e mjedisit për të shndërruar në energji ujërat që derdhen në det. Do të autorizohet ndërtimi i mikro HEC-eve për të prodhuar nga fshatra, komunitete e lagje energji falas.
Këto burime fantastike, të mëdha, të pashtershme energjie do ta bëjnë Shqipërinë një ndër nyjet më të fuqishme energjetike, një superfuqi rajonale energjetike. Do të ketë investime publike në TEC-e gazi me standardet më të larta të respektit mjedisor. Kontratat që ekzisotjnë me TAP-in i bëjnë të mundur Shqipërisë të ndërtojë. Energjia si një nga shtyllat kryesore të programit tonë do të ndryshojë jetën e mbarë qytetarëve shqiptarë”, u shpreh Berisha./E.T
