Bashkimi Europian po përgatit qëndrimin për Shqipërinë me qëllim mbajtjen e konferencës së katërt ndërqeveritare në fund të muajit mars. I pranishëm në Këshillin Kombëtar të Integrimit Europian, ambasadori i BE-së në Tiranë Silvio Gonzato u shpreh besimplotë për hapjen e të gjithë grupkapitujve këtë vit.
“Ne shpresojmë që të gjithë grup-kapitujt të hapen këtë vit. Por sfida e vërtetë nuk është vetëm hapja e grup-kapitujve dhe negociatave për to, por kryerja e reformave që janë të domosdoshme në mënyrë që legjislacioni i Shqipërisë të jetë në përputhje të plotë me atë të Bashkimit Evropian në të gjitha fushat. Nuk ka më kohë për zvarritje dhe delegacioni i BE-së është i gatshëm të mbështesë Kuvendin për të arritur këtë gjë.”
Kryenegociatorja Majlinda Dhuka tha se Shqipëria është gati të celë negociatat edhe për 17 fusha të tjera të ekonomisë së tregut dhe konkurueshmërisë.
“Sot Shqipëria është mesatarisht e përgatitur në 24 nga fushat nga 33 të tilla sa i përket kritereve për anëtarësim, ndaj dhe them se Shqipëria është në miljet e fundit të rrugës së saj europiane. Gjatë vitit 2025 Shqipëria do të përmbyllë çeljen e negociatave për të gjitha fushat dhe të avancojmë me zbatimin e reformave të planit të Shqipërisë europiane.”
Ndërsa sipas Jorida Tabakut puna më e veshtire nuk është hapja por mbyllja e grupkapitujve.
“Sot, zgjerimi i BE-së nuk është më thjesht një çështje burokratike apo ekonomike. Ai është një çështje sigurie dhe stabiliteti. Shqipëria duhet të jetë e përgatitur për këtë realitet të ri dhe duhet të nisë një debat kombëtar mbi detyrimet që kemi ndaj këtij procesi.”
Në fund të 2024, u hapën dy grup kapitujt e parë, Themeloret e Politikat e Jashme. Ndërsa ambicia e Shqipërisë është mbyllja e grupkapitujve brenda 2027. Ndërsa për te rikonfirmuar mbeshtetjen e Bashkimit Europian, të Enjten Tiranën do e vizitojë Komisionerja për Zgjerimin, Marta Kos./k.k
