Kryeministri i Shqipërisë, Edi Rama në komunikimin e tij në platformën ‘Sy m’sy’ ka njoftuar se procedura për mbylljen e TikTok ka përfunduar për telefonat smart.
Nga ana tjetër, kreu i qeverisë theksoi se “mënyra për t’ju shmangur bllokimit duke përdorur VPN falas është shumë e rrezikshme pasi dihet botërisht se hackerat bëjnë namin në grabitjen e të dhënave të telefonit”.
“Kijeni parasysh këtë gjë dhe duroni pa TikTok për ca kohë deri kur të përfundojmë programin e përbashkët me kompaninë, e cila do të vijë së shpejti në Shqipëri dhe do të paraqesë planin për adoleshentët”, tha Rama.
Vendimi për bllokimin e TikTok u mor me arsyetimin e mbrojtjes së të dhënave dhe sigurisë kibernetike, në përputhje me shqetësimet globale mbi përdorimin dhe mbledhjen e informacionit personal nga kjo platformë kineze, shkruan albanian post.
Qasja në platformën kineze TikTok do të ndërpritet në Shqipëri “në ditët në vijim”, njoftoi qeveria shqiptare.
Në vendimin e publikuar, zbulohet se ndërprerja e qasjes në platformën online “TikTok” në Shqipëri, për një afat deri në 12 muaj, bëhet me qëllim “shmangien e ndikimeve negative dhe të problematikave sociale në tërësi, kryesisht në nxitjen e dhunës, veçanërisht te fëmijët… si dhe mbrojtjen e të dhënave personale”./ S.M
