Qendra e Inovacionit dhe Teknologjisë, Durana Tech Park, ka hapur dyer për 34 rezidentë e parë të ndarë në 4 kategori, kompani, start-up, nomadë digjital dhe institucione akademike. Sipas kryeministrit Rama, kjo iniciativë do të ndikojë pozitivisht në ekonominë shqiptare.
“Synojmë që të rrisim eksportet dhe të ardhurat tona me afërsisht 3.5 miliardë euro brenda dy dekadave vetëm nga kjo iniciativë. Synojmë që po ashtu të ardhurat në buxhetin e shtetit gjatë periudhës që po flas vetëm nga kjo iniciativë të jenë mbi gjysmë miliard euro”, tha Rama.
Kryeministri shpreson që Durana Tech Park, të jetë një destinacion për kompanitë europiane në fushën e teknologjisë.
“Ne iu japim atyre një hapësirë që duke qëndruar brenda Europës, të mund të prodhojnë në funksion të BE. Synojmë që të arrijmë shumë shpejt, mbi 5000 mundësi për punë, për ekspertët e teknologjisë dhe profesionistët e rinj, që do të thotë me paga shumë të larta, shumë më të larta se pagat tona”, theksoi kreu i qeverisë.
Përveçse për përkthimin e legjislacionit në procesin e integrimit, qeveria do të aplikojë Inteligjencën artificiale edhe në shërbime, duke nisur me E-Albania.
“Është çështje javësh, në mos një apo dy muajsh që ky nivel tjetër i asistencës në shërbimet digjitale të bëhet i aksesueshëm për publikun e gjerë. Qëllimi tjetër që të kemi në dispozicion një model të Inteligjencës Artificiale për të zhvilluar prokurime publike pa pjesëmarrjen e njeriut. Do ta kemi në dispozicion deri në fund të vitit të ardhshëm apo brenda fundit të vitit të ardhshëm”.
Kryeministri premtoi që do të ndërtojë edhe në Vlorë një hapësirë teknologjike, që sipas tij do të ketë një infrastrukturë e standardeve të Silicon Valley./E.T
