Pas shumë muajsh në rënie, inflacioni iu rikthye rritjes në mars. Kjo do të thotë se çmimet po shtrenjtohen me ritme më të shpejta.
“Perimet të gjitha… domatet, kastravecat, brokoli, kungulli, specat… nga 1 mijë lekë të vjetra për kilogram kanë shkuar më shtrenjtë”, tregtar i fruta-perimeve.
Kriza e çmimeve nuk ka marr fund! Fillim-pranvera e vërtetoi. Inflacioni, treguesi i zhvlerësimit të parasë në raport me shtrenjtimin e çmimeve u rrit në 2.1 për qind në mars pasi kishte mbetur i fiksuar në 1.9 për qind në janar dhe shkurt.
“Si të importit, ashtu edhe ato vendase shumë të shtrenjta. Kanë mbetur çmimet siç ishin për vitin e ri edhe tani në prill. Nuk merret vesh se çfarë bëjnë. Një kg kastravec 3 mijë lekë.”
Shtrenjtimi me ritme më të shpejta i çmimeve muajin e shkuar u ndikua kryesisht nga ushqimet dhe pijet. Inflacioni te kjo kategori produktesh kapërceu në 3 për qind nga 2.8 për qind në shkurt dhe vetëm 2 për qind marsin e një viti më parë.
“Në gjykimin tim, rritja e lehtë e inflacionit muajin e shkuar më shumë është sezonale. Veç kësaj kemi të bëjmë edhe me problemin tjetër, atë të tregtarëve. Kemi spekulime në treg”, tha për A2 CNN, eksperti për ekonominë Eduart Gjokutaj.
Vala e krizës së çmimeve në Shqipëri mund të rikthehet e fortët! Kështu paralajmëroi Banka e Shqipërisë në fund të marsit. Donald Trump me “luftën tregtare” dhe Vladimir Putin me “mësymjen në Ukrainë” do të ishin arsyet.
“Ne teorikisht në import do duhej të kishim çmime më të lira, por kjo nuk do të ndodhë. Çmimet e ushqimeve do të mbesin të shtrenjta në rast se qeveria nuk ushtron kontrolle në tregje”, shtoi Gjokutaj.
Me turizmin që tashmë është shtrirë edhe përtej vetës, në mars u rritën edhe çmimet në baret dhe restorantet e vendit. Inflacioni te kjo kategori shërbimesh arriti në 1.9 për qind./e.t
