Javët e fundit nuk ka ndodhur të mos kemi ndeshur foto të transformuara me versionin e ChatGPT “Ghibli” në rrjetet sociale. Duket shumë bukur dhe argëtues, por a është vetëm kaq?! Kjo formë kaq e thjeshtë për t’u kthyer në një anime ashtu si në filmat klasikë të Hayao Miyazaki, ka dhe anën e saj të errët.
Ekspertët ngrenë alertin se në fakt ky trend mund të jetë një lloj “gracke” për të marrë të gjitha të dhënat personale! Një platformë e njohur që merret me mbrojtjen e të dhënave dhe sigurinë e llogarive në internet, ka njoftuar në “X” se ka rrezik se ato fotografi të cilat ju i përdorni tek ky version i ChatGPT mund të keqpërdoren në të ardhmen. Praktikisht, ruhen të gjitha tiparet tuaja fizike, identiteti juaj!
“Mendoni se ky trend është argëtues apo jo? Mendohuni mirë. Teksa shumica nuk e kanë aspak problem të ndajnë selfie në rrjetet sociale me “Ghibli”, nuk e kuptojnë se po ushqejnë OpenAI me imazhet e tyre dhe familjarëve. Në momentin që ti shpërndan fotot, ti humbet kontrollin mbi to, mënyrën si mund të përdoren. Përshembull, ato mund të përdoren lehtësisht për postime fyese apo denigruese. Të dhënat tuaja mund të përdoren për reklama apo u shiten palëve të treta”, shkruan Proton.
Edhe ekspertja britanike Elle Farrell-Kingsley shkroi për këtë, duke theksuar se përdorimi i këtij trendi sjell ekspozimin e të dhënave, lokacionit apo imazheve sensitive, siç janë fotot e fëmijëve. “Nëse është falas, ti dhe të dhënat tua janë çmimi që paguhet! Nëse je dakord me këtë ok, por mirë është të jeni të vetëdijshëm”, tha ajo.
Kështu që, më e mira është të mos “impresionohemi” menjëherë me trende të kësaj natyre e aq më tepër kur paraqiten pa asnjë kosto!/ S,M
