E ftuar në studion e “Aldo Morning Show” në Tv Klan, sociologia Entela Binjaku tha se sipas raportit të INSTAT është regjistruar numri më i ulët i lindjeve në vendin tonë, pas 90 vitesh.
Sociologia tha se çiftet e reja hasen me shumë vështirësi. Sipas saj pas lindje së fëmijët së parë ata hezitojnë që të kenë dhe një fëmijë të dytë, apo të tretë. Entela Binjaku shtoi se çiftet e reja sot nuk kanë mbështetje dhe përkrahje familjare, e aq më pak institucionale.
“Mjaft të rinj dhe të reja kur bëjnë fëmijën e parë, për të dytin hezitojnë sepse e shikojnë veten që janë tepër të zënë, merr me më shumë kohë qëndrimi jashtë familjes, se sa brenda saj dhe ata nuk e kanë mundësinë që t’i përkushtohen fëmijës së dytë. Sikundër ka edhe çifte të tjera, të cilat edhe nëse do të donin të sillnin në jetë fëmijën e dytë nuk kanë mbështetjen nga të tjetër se më kë ta lënë këtë fëmijë. Gjithmonë familjet shqiptare këtë kanë bërë, që njëri prej partnerit sakrifikon më shumë se sa tjetri. Nuk duhet të harrojmë, që ka çifte të reja që janë me fëmijë dhe kanë orare pune të tejzgjatura, që nuk kanë mundësi. Edhe nëse do të kenë dëshirën realisht nuk kanë mundësi.”
Për të frenuar këtë fenomen sociologia tha se qeveria duhet të ndjekë një sërë politikash, siç mund të jetë rrija e bonusit të bebes, t’u ofrojë çifteve të reja ndihmë në kuptimin financiar, t’u ofrojë një punë të sigurt apo të marrë masa në uljen e shpenzimeve.
“Mbështetje për familjet e reja. Shumë e shumë studiues e vënë theksin tek kjo masë që mund të japë rezultate të mira. Nëse familjeve të reja iu ofrojmë ndihmë në kuptimin financiar dhe atë të sigurisë, që të kenë një strehë mbi kokë, në kuptimin që kenë një punë të sigurt, në kuptimin e masave për uljen e shpenzimeve për të sjellë në jetë një fëmijë gjatë muajve të parë të jetës, ndoshta kjo mund të kishte reflektuar.”/E.S
