Një çift lesbikesh nga Shkodra nga Shqipëria ka fituar azilin në Mbretërinë e Bashkuar pasi dëshmuan se “Shqipëria është homofobike”.
The Telegraph i ka kushtuar rastit një artikull të plotë ku shkruan se një gjykatë britanike vendosi se kthimi i tyre në atdhe do t’i ekspozonte ndaj rrezikut të diskriminimit dhe përndjekjes.
Dy vajzat, kanë dëshmuar dhe vërtetuar se në Shqipëri kishin qenë viktima të trafikimit dhe dhunës për shkak të orientimit të tyre seksual.
Sipas dokumenteve të gjykatës, dëshmohet se si ishin rrëmbyer, sulmuar seksualisht dhe abuzuar fizikisht nga disa burra, pasi ishin parë duke u puthur në publik.
“Avokatët e tyre theksuan se ekziston një lidhje e qartë mes orientimit të tyre seksual dhe faktit që ishin trafikuar, dhe se në Shqipëri viktimat e trafikimit shpesh fajësohen dhe stigmatizohen, duke pasur vështirësi në integrimin social dhe punësimin.” Shkruan Telegraph.
Ishte gjykatësja Rebecca Chapman e cila vlerësoi se gratë do të ishin të rrezikuara nëse do të ktheheshin në qytetin e tyre të lindjes, Shkodër.
Ajo shtoi se edhe nëse do të përpiqeshin të zhvendoseshin në një pjesë tjetër të Shqipërisë, vendi është i vogël dhe dy vajzat lezbike nuk kanë siguri./E.S
