Lara Colturi, skiatorja italo-shqiptare ka kërkuar zyrtarisht që të largohet nga Shqipëria dhe të përfaqësojë vendin e lindjes, Italinë. Për momentin Komiteti Olimpik Ndërkombëtar nuk e ka dhënë miratimin, mirëpo kërkesa e 18-vjeçares ka kohë deri më 1 maj për t’u shqyrtuar.
Do jetë fillimi i muajti që vjen ai që do vendos fatin e Colturit, e cila në Kupën e Botës që lamë pas ia doli të siguronte tre herë podiumin dhe të ngrinte flamurin kuqezi, duke u renditur në pozicionin e 7-të në tabelën finale.
Mësohet se kërkesa është bërë para përfundimit të Kupës së Botës dhe Colturi kërkon të përfaqësojë Italinë në Olimpiadën Dimërore të Milano-Cortinës në vitin 2026. Në bazë të rregullave botërore të Federatës Ndërkombëtare të Skive, nëse ajo largohet pa miratim, atëherë Lara Colturi do të qëndrojë një vit pushim, një vit pa Kupë Bote dhe pa Olimpiadë Dimërore.
Duket se një ‘bashkëjetesë’ e bukur mes Colturit dhe Shqipërisë do përfundojë pas katër vitesh. Paçka dëshirës së Shqipërisë për të pasur në grup një nga talentet më të mëdha të skive botërore, mundësitë dhe buxhetet e kufizuara të vendit tonë për një nga sportet më të kushtueshme do na lënë pa një kampione të ardhshme./E.S
