Një incident ka ndodhur dje në burgun Bassone në Como, ku disa të burgosur janë përfshirë në një përplasje fizike. Ngjarja ka ndodhur në pasditen e djeshme, kur një grup prej dhjetë të burgosurve shqiptarë ka arritur të thyejë një portë të brendshme që ndante seksionin e tyre nga ai i një grupi rival, ku ishin të burgosur nga Afrika Veriore.
Konflikti është ndërprerë shpejt nga policia e burgut. Katër nga të përfshirët janë plagosur dhe janë dërguar për trajtim në spitalin Sant’Anna të Como.
Për të rivendosur rendin, autoritetet kanë dërguar përforcime nga Milano, ndërsa disa nga të burgosurit shqiptarë janë transferuar në burgje të tjera si Opera, Vigevano dhe Cremona, raportojnë mediat italiane.
Arsyet e përplasjes mendohet të lidhen me konflikte të mëparshme mes grupeve të burgosurve./E.T
