Uashingtoni pret sot përgjigjen e Ukrainës për një marrëveshje paqeje me Rusinë. Kjo marrëveshje, sipas raportimeve të agjencisë së lajmeve Axios, përfshin njohjen e Krimesë nga SHBA si territor rus dhe pranimin jozyrtar të sovranitetit rus mbi territoret e pushtuara që nga viti 2022.
Dokumenti u është prezantuar zyrtarëve ukrainas në Paris para pak ditësh dhe përshkruhet si “propozimi final” i Donald Trump për arritjen e marrëveshjes Rusi-Ukrainë.
Ky propozim kërkon lëshime nga presidenti ukrainas Zelensky, i cili më parë ka thënë fuqimisht se refuzon çdo njohje të okupimit nga Rusia të Krimesë dhe rajoneve të tjera në rajonin lindor të Ukrainës.
Përfitimet e Rusisë nga kjo marrëveshje përfshijnë tri pika: njohja zyrtare e sovranitetit mbi Krimenë, njohja joformale e pushtimit rus të pothuajse të gjithë rajonit të Luhanskut si dhe zonave të pushtuara në Donetsk, Kherson dhe Zaporizhia, si dhe premtimi i mosanëtarësimit të Ukrainës në NATO.
Anëtarësimi në BE do të mbetet i mundshëm. Rusia përfiton edhe heqjen e sanksioneve të vendosura pas vitit 2014 dhe rritjen e bashkëpunimit ekonomik me SHBA-në, kryesisht në sektorët e energjisë dhe industrisë.
Përfitimet e Ukrainës: garanci sigurie nga një grup vendesh europiane, kthimi i një territori të vogël të rajonit të Kharkiv-it të pushtuar nga Rusia, kalimi i lirë në lumin Dnieper si dhe kompensim dhe ndihmë për rindërtim. m.p.
