Prej disa javësh, disa portale në Shqipëri janë bërë përndjekëse të prodhuesve vendas, fermerëve dhe fshatarëve të ndershëm, të cilët prodhojnë produkte të ndryshme ushqimore prej disa dekadash.
Kjo dashakeqësi e pashembullt po bëhet agresive, kur në rrjetet sociale qarkullojnë shkrime të përsëritura, të cilat sulmojnë intensivisht prodhuesit vendas.
Në industrinë e përpunimit të qumështit dhe mishit janë investuar miliona euro në Shqipëri. Këto industri prodhojnë e përpunojnë produkte cilësore e të standardeve më të larta europiane.
Mijëra fermerë janë furnizues të këtyre industrive dhe sigurojnë jetesën me punë të ndershme me familjet e tyre, duke kontribuar edhe në një shoqëri të shëndetshme me produktet që ne konsulmojmë.
Natyrshëm lind pyetja: kush janë financuesit e këtyre portaleve, ku gazetarë anonimë detyrohen për të bërë artikuj kundër prodhimeve shqiptare? Si ka mundësi që këto portale nuk bëjnë asnjë shkrim për kompanitë e importit nga Serbia dhe Maqedonia e Veriut? A kanë lidhje ato me sponsorizues apo shërbime sekrete të këtyre dy vendeve të rajonit?
Eshtë e qartë se kjo është një fushatë sistematike denigruese ndaj prodhuesve vendas, me qëllim për të dëmtuar imazhin e tyre dhe për të favorizuar prodhimet nga vende si Serbia dhe Maqedonia e Veriut.
Mes këtyre portaleve gjobëvënëse, ka edhe ndër ato të cilat më parë janë dënuar për shpifje, gjë që e përforcon edhe më shumë faktin se kemi të bëjmë me një fushatë masive sulmi ndaj prodhuesve shqiptarë. m.p.
