Një ditë para ndeshjes mes Shqipërisë dhe Serbisë, pika kufitare në Morinë është shndërruar në një vend festimi.
Tifozët kuq e zi nga Kosova, së bashku me djemtë e Luginës së Preshevës, janë organizuar për të përkrahur kombëtaren shqiptare, përmes këngëve patriotike, thirrjeve “Shqipëri etnike” dhe “Fitore Shqipëri”, duke krijuar një atmosferë elektrizuese në kufi, shkruan A2 CNN.
“Kemi ardhur me zemër për kombëtaren. Sot jemi të gjithë bashkë. Shqipëria do fitojë!” tha një prej tifozëve.
Gjatë kesaj pasdites janë shtuar edhe më shumë tifozët nga Kosova, të cilët kanë hyrë në Shqipëri për të ndjekur ndeshjen apo për të kaluar pushimet në bregdet. Ata janë të bindur për fitoren e kuqezinjve.
“Po shkoj në bregdet. Shpresoj të mos ketë provokime nga serbët. Unë parashikoj 2-1 për Shqipërinë”, tha një prej tifozeve.
Ndërkohë, ndër qytetarët që po kalonin kufirin kishte edhe jo tifozë që udhëtonin për arsye pune. Një prej tyre, nga Serbia, u shpreh se ndeshja pritet të jetë e barabartë.
“Të dy ekipet janë të forta. Mendoj se do dalë barazim, 1-1”, tha qytetari nga Serbia. Edhe një qytetar nga Kroacia që po udhëtonte drejt Shqipërisë, dha mendimin e tij:
“Shqipëria ka lojtarë të mirë. Mendoj se do fitojnë”, tha një qytetar nga Kroacia. m.p.
