E ardhmja e Rei Manajt pritet të jetë larg Sivasporit, skuadër që sezonin e fundit ra nga elita e futbollit turk. Largimi i sulmuesit të Kombëtares shqiptare duket gjithnjë e më i sigurt, por jo domosdoshmërisht edhe largimi nga Turqia.
Sipas raportimeve të fundit nga mediat turke, për Manajn ka shfaqur interes konkret Samsunspor, një skuadër që e mbylli sezonin në vendin e tretë në Superligë dhe që do të marrë pjesë në kupat e Europës këtë verë. Klubi është në kërkim të përforcimeve dhe Manaj shihet si një opsion ideal për repartin ofensiv, për shkak të eksperiencës së tij dhe aftësisë për të bërë diferencën në zonë.
Ndërkohë, vetë Manaj ndodhet me pushime në Jug të Shqipërisë, ku po relaksohet pas një sezoni sfidues, duke pritur të mbyllet e ardhmja e tij.
Me rënien e Sivasporit nga Superliga, largimi i sulmuesit duket thuajse i pashmangshëm dhe mbetet për t’u parë se cili do të jetë destinacioni i tij./ D.C
