Shumica qeverisëse duket se është tërhequr nga vendimi për shkarkimin e Presidentit të vendit, Ilir Meta, pas hetimit të bërë në Komisionin e Posaçëm Hetimor në Kuvend për shkarkimin e kreut të shtetit.
Në seancën e sotme, kreu i Komisionit, Ulsi Manja, tha se raporti është marrë vetëm para pak minutash, ndërkohë që prezantimi bëhet sot.
Në mbledhjen që po mbahet aktualisht në Komisionin Hetimor për Metën, socialistët janë shprehur se shkeljet e konstatuara nga ata qëndrojnë, por ato nuk sollën pasoja që të çojnë deri në shkarkimin e Presidentit.
“Këto shkelje referuar rrethanave dhe pasojave dhe fakti që komisioni nuk mund të shprehet se janë ekskluzivitet i gjykatave, janë shkelje që kanë natyrë që diktojnë marrjen e masave të menjëhershme për plotësimin e aktit kushtetueses për evitimin e situatave bllokuese, por nuk janë të mjaftueshme për të justifikuar shkarkimin e Presidentit.
Kemi një shkelje për shfuqizimin e dekretit. U cenua e drejta për të zgjedhur. Kryerja e veprimeve për anulimin apo shtyrjen e zgjedhjeve cënuan edhe parimin e së drejtës së popullit për të qenë sovran dhe për të ushtruar të drejtat e tij.
Sa i përket pasojave, ne arrijmë në konkluzionin që ka pasur shkelje në lidhje me anulimin e datës së zgjedhjeve, por për të analizuar çfarë pasojash sollën është marrë në konsideratë praktika që kemi administruar edhe nga policia edhe nga prokuroria.
Tensione ka pasur, që vihen re nga veprat penale të referuara në prokurori, pas kësaj periudhe, por këto tensione janë mbajtur nën kontroll dhe nuk ka pasur dhunë, zgjedhjet u realizuan, pavarësisht situatave, qytetarët votuan.
Por shkeljet qëndrojnë. Kolegët kanë të drejtë për shkeljet, ashtu sikur e ka konfirmuar Komisioni i Venecias, por nuk sollën pasojë përvec situatave të tensionit që u miratuan nga organet e rendit. Arrijmë në konkluzionin se bojkoti i partive nuk mund të justifikojnë mos mbajtjen e zgjedhjeve”, tha ndër të tjera deputetja Klotilda Bushka./Bl.Ba/Fjala.al
