Gazetari dhe moderatori Sebastian Zoja ka reaguar lidhur me letrën e biznesmenes Vilma Nushi, e infektuar me COVID-19, drejtuar qytetarëve pas mallkimeve të marra nga ta.
Në një postim në rrjetet sociale, gazetari shkruan se qytetarët nuk u revoltuan për pasurimin e Vilma Nushit, por pse ajo zgjodhi Turqinë për kurim, ndërsa përditë na thuhet se jemi në majat e mjekësisë botërore me sistemin tonë.
Sebastian Zoja shton më tej se Vilma Nushi nuk na i tha në letrën e saj pse shkoi në Turqi për kurim.
Postimi i plotë:
Zonja Vilma Nushi, me të drejtën e Zotit, në letrën e saj, shkruan se nuk kemi pse ta mallkojmë. Ajo beson te shprehja “Ta bëft Zoti, si ke shpirtin!”.
Covidi është punë e Zotit, librat e kontabilitetit që ajo citon janë punë e qytetarëve.
Ndaj qytetarët nuk u revoltuan për pasurimin e Vilma Nushit, por pse ajo zgjodhi Turqinë për kurim, ndërsa përditë na thuhet se jemi në majat e mjeksisë botërore me sistemin tonë suedezo-kanadez të mjeksisë falas. Këtë s’na tha Vilma në letrën e saj publike: Pse shkove në Turqi?
Ngjashëm, gjithnjë qytetarët shqiptarë i kanë bërë pyetje pasunarëve e pushtetarëve të vet: pse mbani dyshtetësi (amerikane, gjermane, austriake…). Kur nuk ndiheni të sigurtë ju që keni frerët e pushtetit e kapitalit në këtë vend, e merrni dyshtetësi, po ne si duhet të ndihemi?
Vilma kurohet në Turqi, e ju kapitalin e dërgoni nëpër Offshore…
Të çuditshme këto kohë; proletarët s’kanë atdhe. Por as kapitalistët s’paskan! Atdheu është jetim.
/En.Br./Fjala.al
