Në lidhje me ngjarjen e rëndë në fshatin Buçimas në Pogradec ka folur edhe mjeku psikiatër Gentian Çala, i cili ka vizituar më parë 44-vjeçarin me probleme mendore, Olsi Çekiçi.
Ai shprehet se 44-vjeçari vuante nga çrregullimet mendore si pasojë e përdorimit të lëndëve narkotike dhe se nën efektin e tyre dhunonte anëtarët e familjes.
Mjeku psikiatër shprehet se autori nuk pranonte të merrte mjekime, ndërsa e ëma, e mbetur viktimë në këtë ngjarje, shkonte shpesh në qendrën e shëndetit mendor dhe kërkonte recetë për të birin.
“Autori i krimit vuante nga çrregullime mendore, të cilat kishin si shkak përdorimin e substancave narkotike. 44-vjeçari, nën efektin e narkotikëve dhunonte anëtarët e familjes. 44-vjeçari nuk pranonte të merrte mjekime.
E ëma shkonte shpesh në qendrën e shëndetit mendor dhe kërkonte recetë për të birin”, tha Gentina Çala, mjek psikiatër.
Familja Çekiçi ka hapur dyert e mortit, një ditë pas ngjarjes makabër të vrasjes së nënës 70-vjeçare nga i biri. Të afërmit e familjes kanë hapur dyert për të pritur vizitat, ndërsa shprehin dhimbjen për ngjarjen e rëndë.
Të afërmit shprehen se Firdes Çekiçi, 70 vjeç, ishte një ‘shpirt njeriu’, një grua mjaft e vlerësuar dhe e dashur në fshat, që fatkeqësisht jeta e saj u mbyll në një mënyrë tragjike nga dora e të birit./Bl.Ba/Fjala.al
