Arma kërciti sërish mbrëmjen e djeshme në Shkodër. Qyteti verior u trondit nga një tjetër atentat mafioz. Gledis Kraja, 23-vjeç, u ekzekutua me breshëri automatike, teksa ndodhej në makinën e tij në lagjen “Qafë Hardhi”.
Mësohet se Kraja, i lindur në Lezhë, në të kaluarën ka qenë edhe futbollist, teksa rezulton aktiv në faqen e Federatës Shqiptare të Futbollit.
Nga të dhënat rezulton se 23-vjeçari në vitin 2013 ka qenë pjesë e klubit të Vllaznimit të Shkodrës, duke luajtur në nivele amatore, kryesisht në kampionatin e të rinjve.
Ndërkohë, burime bëjnë me dije se policia ka identifikuar autorin e ngjarjes. Bëhet fjalë për shtetasin Sebastian Smakaj, i cili tashmë është shpallur në kërkim nga uniformat blu. Mësohet se vëllai i vogëli Sebastian Smakajt, i cili dyshohet si autor i ngjarjes, ishte shok me viktimën, Gledis Kraja.
Ende nuk dihen shkaqet e këtij atentati të rëndë që ka tronditur qytetin verior./En.Br./Fjala.al
