Nga /Fjala.al/
Kontrata për kalimin e banesave/shtëpive individuale në pronësi të përfituesve duhet të përmbajë të paktën parashikimet e modelit tip, që i bashkëlidhet këtij vendimi dhe është pjesë përbërëse e tij.
Kontrata duhet të shoqërohet me deklaratën noteriale të heqjes dorë nga subjektet përfituese nga çdo pretendim mbi të drejtat e pronësisë për banesën apo shtëpinë individuale të mëparshme, përveç rasteve kur parashikohet ndryshe në këtë vendim ose në aktin normativ nr. 9, datë 16.12.2019, të Këshillit të Ministrave, “Për përballimin e pasojave të fatkeqësisë natyrore”, si kusht për përfitimin nga programet e procesit të rindërtimit.
Njësia e vetëqeverisjes vendore, autoritetet shtetërore ose Enti Kombëtar i Banesave mund të miratojnë përfitimin e subjekteve nga një program i procesit të rindërtimit dhe për ato subjekte që nuk janë banorë të territorit të njësisë së vetëqeverisjes vendore që merr në shqyrtim aplikimin ose që nuk janë banorë të njësisë së vetëqeverisjes vendore ku ndodhet prona/banesa që përfitohet, me kusht që të rezultojnë subjekte që përmbushin kriteret për përfitim në territorin e një njësie tjetër të vetëqeverisjes vendore ku është shpallur gjendja e fatkeqësisë natyrore dhe bazuar mbi një kërkesë të Komisionit Shtetëror të Rindërtimit, për arsye të mungesës së mundësive për strehim në njësinë e vetëqeverisjes vendore ku ka vendbanimin subjekti.
Në këtë rast subjekti përmbush detyrimet për aplikim sipas parashikimeve të këtij vendimi, pranë njësisë së vetëqeverisjes vendore ku ndodhet prona/banesa që përfiton.
Shtëpitë e dëmtuara, skema e kompensimit
Familjet që kanë dëmtime në banesa ose shtëpi individuale nga fatkeqësia natyrore, të cilat nuk kanë nevojë të rindërtohen nga e para, trajtohen me grante rikonstruksioni sipas parashikimeve të aktit normativ nr. 9, datë 16.12.2019, të Këshillit të ministrave, “Për përballimin e pasojave të fatkeqësisë natyrore”. Shoqëritë tregtare, të vogla e të mesme, vendet e kryerjes së aktivitetit të të cilave janë dëmtuar dhe/ose zhvendosur për shkak të
fatkeqësisë natyrore, vërtetuar me dokumente zyrtare, me qëllim rikonstruksionin e shpejtë ose sigurimin e mjediseve të përshtatshme për kryerjen e veprimtarisë nga punëmarrësit përfitojnë mbështetje ekonomike sipas parashikimeve të aktit normativ nr. 9, datë 16.12.2019, të Këshillit të Ministrave, “Për përballimin e pasojave të fatkeqësisë natyrore”.
Njësitë e vetëqeverisjes vendore marrin masa që subjektet, të cilat nuk përfitojnë nga një program i caktuar, të kenë mundësi për të kaluar në një program tjetër të procesit të rindërtimit. Kushtet dhe rregullat që parashikohen në
këtë vendim zbatohen dhe nga Enti Kombëtar i Banesave ose autoriteti përgjegjës shtetëror në rastet kur me kërkesë të Komisionit Shtetëror të Rindërtimit dhe/ose me vendim të Këshillit të Ministrave ngarkohet me detyra në zbatim të aktit normativ nr. 9, datë 16.12.2019, të Këshillit të Ministrave, “Për përballimin e pasojave të fatkeqësisë natyrore”.
