Kreditë që nuk kthehen në afat në banka kanë zbritur historik. Banka e Shqipërisë bën të ditur se huatë me probleme zbritën në 9.53% në nëntor, me një rënie prej 0.64 pikë përqindje në raport me muajin e mëparshëm. Ky është niveli më i ulët që nga tremujori i tretë i vitit 2009. Pas kësaj periudhe, kredimarrësit që vonoheshin më shumë se tre muaj për të paguar këstet filluan të rriteshin ndjeshëm, duke kulmuar në shtator 2014, në gati 25%, nivelet rekord të larta që nga fillimi i viteve 2000, kur mori hov zhvillimi i sistemit bankar privat.
Pas kulmimit të huave problematike në 25%, banka e Shqipërisë nisi një plan të gjerë për uljen e tyre, që përfshinte përmirësimin e rregulloreve për fshirjen e kredive si dhe ristrukturimin e huave të mëdha. Banka e Shqipërisë tha në raportin e fundit të politikës monetare se raporti i kredisë me probleme ndaj totalit është shfaqur në vazhdimësi në rënie, duke konfirmuar kushte më favorizuese për zgjerimin e ofertës për kredi nga bankat.
Banka e Shqipërisë vlerëson se rënia e kredive me probleme, krahas përmirësimit të aktivitetit ekonomik, pasqyron edhe angazhimin e bankave në përmbushje të planit të masave për të ulur kreditë me probleme. Pak kohë më parë, Banka e Shqipërisë miratoi një plan shpëtimi të pagëzuar si “Qasja e Tiranës”, për bizneset që kanë dështuar në shlyerjen e kredive në banka, me vlerë mbi 8 milionë euro. Plani i shpëtimit, tashmë në fuqi, do të nisë të aplikohet në muajin shtator për 9 korporata, nga grupi i të 35 kompanive që ishin problematike në kthimin e huave.