Lindja e Mesme vijon të jetë në qendër të vëmendjes së politikës botërore. Tensionet rreth çështjes së Iranit dhe SHBA-ve në Lindjen e Mesme vijojnë të prodhojnë reagime të shumta.
Kështu, ministri i Jashtëm i Rusisë, Sergey Lavrov, është shprehur se veprimet e pamatura të SHBA-së kanë shkaktuar një fatkeqësi në rajonin e Lindjes së Mesme.
“Veprimet e pamatura të SHBA-së dhe aleatëve shkaktuan fatkeqësi në rajonin e Lindjes së Mesme”, deklaroi Lavrov, gjatë fjalës së mbajtur në degën e Institutit të Diplomacisë Shtetërore të Moskës në Tashkent.
Kryediplomati rus Lavrov tha se vendet si Iraku dhe Libia janë ndarë si pasojë e veprimeve të SHBA-së. Ndërsa shtoi se edhe gjendja rreth Iranit është përkeqësuar.
Shefi i diplomacisë ruse po ashtu tha se SHBA po përpiqet të konkurrojë në mënyrë të padrejtë dhe po pengon aktivitetet e Organizatës Botërore të Tregtisë.
“Duke shfrytëzuar sanksionet ilegale dhe duke keqpërdorur statusin e dollarit, SHBA po përpiqet t’ua imponojë shteteve të tjera vendimet e veta”, theksoi Lavrov.
