Mbyllet me rrjeta të paprekura takimi i luajtur në “Loro Boriçi” dhe i transmetuar nga RTSH Sport. Vllaznia, e cila ka zhvilluar të dielën edhe miqësoren e 8-të, duke u ndarë me rrjeta të paprekura me Apoloninë, në takimin e sjellë për sportdashësit drejtpërdrejt në Rrjetin e Radio-Televizionit Shqiptar, në kanalin RTSH Sport.
Ka qenë një ndeshje ku dy trajnerët, gjermani Tomas Brdariç i shkodranëve dhe italiani Xhovani Kolela i fierakëve, kanë patur mundësinë të shikojnë gjendjen e futbollistëve të tyre, por edhe të provojnë skema të ndryshme loje në pritje të nisjes së Kategorisë Superiore.
Në mungesë të ndeshjeve zyrtare, për shkak të vazhdimit të bojkotit të Ligës Profesioniste të Futbollit, ekipet shqiptare vijojnë t’i mbajnë lojtarët e tyre në tonus nëpërmjet ndeshjeve miqësore. Dhe një nga skuadrat më aktive, teksa ka luajtur që nga 10-ditëshi i fundit i gushtit 7 takime miqësore, ka qenë Vllaznia, e cila ka zhvilluar të dielën edhe miqësoren e 8-të, duke u ndarë me rrjeta të paprekura.
Brdariçi e nisi ndeshjen me Qarrin në portë, e më pas me Lekajn, Shehin, Imamin, N. Hoxhajn, Ramadanin, Uheid. Hoxhën, Kalanë, Mandiangunë, Çobën, Dilaverin e zëvendësuar drejt fundit të pjesës së parë nga Deda.
Në krahun tjetër, Kolela u kundërpërgjigj me Cakon në portë, e më pas me Soton, Cullin, Andonin, Mehmetin, Zogajn, Haxhiun, Hebejën, Zaimajn, Ejohun dhe Gjatën. Pavarsisht rasteve të shumta të krijuara, skuadrat nuk arritën të gjenin rrugën e rrjetës. Në fakt, ishin fierakët ata që dhanë sinjalin e parë me Ejoh, por topi u ndal te shtylla. Më pas loja foli për shkodranët, që iu afruan disa herë golit, me Dilaverin si dhe Mandiangunë apo Dedën, por pa sukses dhe pjesa e parë mbyllet kështu pa gola.
Në pjesën e dytë, Vllaznia e mbizotëroi lojën, duke mos arritur sidoqoftë të gjente golin, përtej ndërrimeve që trajnerët Brdariç dhe Kolela bënë. Vendasit ia dolën të dërgonin topin në fundin e ndeshjes, por goli u anulua për pozicion të parregullt. Përfundimisht 0-0 dhe asnjë fitues mes Vllaznisë dhe Apolonisë, në atë që padyshim ishte një test i dobishëm për të dyja skuadrat.
La.Mi/Fjala.al
