Pas tensioneve midis Shteteve të Bashkuara të Amerikës dhe Iranit, si dhe rrëzimit të avionit ukrainas, Irani është dorëzuar përpara presionit të Perëndimit.
Teherani ka vendosur që të dërgojë në Ukrainë kutitë e zeza të avionit të pasagjerëve që u godit nga ushtria iraniane këtë muaj.
Sipas agjencisë iraniane të lajmeve, “Tasnim”, kutitë do të ekzaminohen në Kiev nga ekspertë francezë, kanadezë e nga Shtetet e Bashkuara.
Incidenti i 8 janarit shkaktoi vdekjen e të 176 personave që ndodheshin në avion.
“Falë ekspertizës franceze, kanadeze dhe amerikane do të përpiqemi të lexojmë të dhënat e regjistruara të fluturimit në Ukrainë”, tha Hassan Rezaifar, drejtori përgjegjës për hetimin e aksidenteve në Autoritetit iranian të Aviacionit Civil.
Pesëdhjetë e shtatë nga pasagjerët që humbën jetën ishin kanadezë.
Kryeministri Justin Trudeau, i cili ka bërë presion për një hetim të plotë të incidentit, tha të premten se Irani duhet t’i dërgojë kutitë e zeza në Francë për shqyrtim.
Nga ana tjetër, Franca është një nga vendet e pakta me aftësinë për të lexuar regjistruesit e të dhënave të fluturimit dhe kabinës së avionit.
