Infektimit të Covid-19 nuk i ka shpëtuar as aktori Agron Llakaj, i cili, së bashku me bashkëshorten, ka luftuar për disa javë me virusin që po merr mijëra jetë në të gjithë botën. Për fat të mirë, Llakaj dhe bashkëshortja kanë dalë me sukses nga e gjithë kjo betejë e keqe, pasi, më në fund, kanë rezultuar negativë në ritestimin e kryer.
Ndjesitë që i la kjo gjendje, aktori dhe drejtuesi i “Al Pazar” i ka ndarë me publikun, madje edhe u ka dërguar një mesazh të gjithë atyre që e neglizhojnë praninë e tij apo edhe refuzojnë të përdorin maskë.
“Të dashur miq! Më në fund, pas një beteje relativisht të moderuar me covid 19, pas rreth 20 ditësh, ime shoqe Kostandina dhe unë morëm përgjigjen ‘negativ’ të tamponit. Ne ia dolëm, me qetësi dhe pa panik… Në mbështetje të njëri-tjetrit, por me kujdesin absolut dhe të vajzës sonë, Alkida, që nuk mori parasysh rriskun për vete, por na shërbeu deri në momentin e kapërcimit të situatës. “Kush ka vajza, botën ka”, thotë kënga.
Pasi falënderon dhe u shpreh mirënjohjen mjekëve dhe personelit mjekësor që i ka shërbyer, aktori i njohur thotë se së shpejti do të kthehet në “Al Pazar”, me më shumë dëshirë dhe pasion. Por nuk mund ta mbyllë mesazhin e tij edhe me një kërkesë për të gjithë miqtë që e ndjekin.
“Dhe në fund, dy fjalë për të gjithë. Jeta e çdonjërit prej nesh është dhurata më e bukur që Zoti na ka falur. Zoti ju ruajt dhe paçi shëndet në familjet tuaja. Le të gëzojmë me njëri-tjetrin për çdo ditë që Zoti na fal.
Koha të duam dhe të mbështetim më shumë njëri-tjetrin në këtë luftë duke zbatuar protokollin e ISHP-së. Mos e neglizhoni maskën, distancimin fizik dhe social, të cilat sjellin më pak njerëz të infektuar. Zoti qoftë me të gjithë ne! Një ditë do jemi në një përqafim të madh”, përfundon mesazhin aktori./Bl.Ba/Fjala.al
