Turizmi inteligjent është dimensioni i radhës ku do të ketë përpjekje për të orientuar bizneset shqiptare për të zhvilluar idetë e tyre. Ministria e Financave dhe Ekonomisë shpalli këto ditë thirrjen e parë për bizneset në sektorin e turizmit të cilët janë të interesuar të zhvillojnë idetë e tyre.
Këto të fundit do të mbështeten nga projekti NEST – Rrjeti për Zhvillimin e Turizmit të Mençur (Projekti Nr. 96 / Thirrja e Parë Projekt Standard – INTERREG IPA CBC Itali-Shqipëri-Mali i Zi) dhe kanë afat deri në 8 janar të paraqesin konceptin.
“Me synimin për të kontribuar në zhvillimin e destinacioneve të turizmit inteligjent, brenda projektit NEST, përzgjedhja e ideve dhe bizneseve për itinerare të reja për “destinacionin e turizmit inteligjent” në Shqipëri, synon të bashkojë grupet e synuara të përfshira në veprimet e programit pilot dhe të laboratorit në kohë reale të projektit NEST, në krijimin pjesëmarrës të iniciativave në territoret e përcaktuara”, thuhet në paraqitjen e Financave. Subjektet e përfshira në këtë aktivitet do të thirren për të mbështetur dhe promovuar itinerare inteligjente destinacioni në mënyrë që të prodhojnë një avantazh të vërtetë konkurrues dhe shërbime inovative për ndërmarrjet e vogla dhe të mesme në territorin tonë.
“Pjesëmarrësit thirren të propozojnë itinerare të turizmit eksperimental gjithashtu ndërkufitar – në fushat e sportit dhe natyrës dhe kulturës dhe ushqimit dhe verës (eno-gastronomisë) – me përfshirjen e autoriteteve lokale, operatorëve turistikë dhe kompanive që veprojnë në territoret në fjalë”, nënvizohet në dokument.
Ky projekt do të lejojë krijimin e itinerareve të reja eksperimentale të bazuara në menaxhimin inteligjent të destinacioneve lokale, gjithashtu në një perspektivë ndërkufitare. Itineraret e zgjedhura, koherente me kontekstet tematike të specifikuara më poshtë dhe që lidhen me Shqipërinë, do të duhet të favorizojnë zhvillimin e sipërmarrjes lokale inovative dhe të rrisin atraktivitetin e destinacioneve më pak të njohura, duke rritur dhe promovuar veçoritë e secilës zonë pilot.
Referuar kritereve Financat bëjnë me dije se janë disa kategori që mund të dorëzojnë propozime për krijimin e itinerareve tematike duke nisur nga autoritetet lokale e entet publike tek sipërmarrësit dhe bizneset në sektorin e turizmit e deri tek qytetarët e thjeshtë që duan të vendosin objektet e tyre në dispozicion të itinerareve.
l.m/Fjala.al