Policia e Durrësit ka gjobitur me një gjobë prej 50 milionë lekësh (të vjetra) Abdulla Deliallisi, kryetar i shoqatës “Durrësi Autokton”, i cili organizoi takim me më shumë se 10 persona në ambient të mbyllur.
Bëhet fjalë për një takim i organizuar nga shoqata që ai drejton në sallën e pallatit të kulturës Aleksandër Moisiu të qytetit, ku ka marrë pjesë edhe presidenti Ilir Meta.
Qëllimi i takimit ka qenë dekorimi i Arkeologut Vangjel Toçi pas vdekjes me titullin Nderi i Kombit.
Në sallë ka pasur shumë të pranishëm në kundërshtim me masat që parashikon protokolli për tu mbrojtur nga Covid-19.
Njoftimi i plotë i policisë:
Drejtoria Vendore e Policisë Durrës
Vijojnë kontrollet nga Policia e Durrësit, për monitorimin e zbatimit të masave anticovid, me qëllim parandalimin e përhapjes së COVID-19.
Strukturat e Policisë Durrës, krahas përmbushjes së detyrave funksionale për parandalimin dhe goditjen e paligjshmërisë, vijojnë kontrollet për monitorimin e zbatimit të masave për parandalimin e përhapjes së COVID-19.
Si rezultat i kontrolleve, shërbimet e Komisariatit të Policisë Durrës kanë evidentuar dhe ndëshkuar me masë administrative 5.000.000 lekë, shtetasin A. D. (përfaqësues i një shoqate), pasi ka organizuar një aktivitet në kundërshtim me Aktin Normativ Nr. 3 datë 15.03.2020, pikën 2 të nenit 3, si dhe pikën 1 të Urdhrit nr. 633 datë 17.11.2020 “Për ndalimin e grumbullimeve në vende të mbyllura apo të hapura”.
Drejtoria Vendore e Policisë Durrës apelon për të gjithë qytetarët që të respektojnë me korrektësi masat anticovid dhe i fton ata të denoncojnë në Komisariatin Dixhital, cilindo që nuk respekton këto masa kufizuese, duke u kthyer në burim rreziku për qytetarët.
