Ambasadorja e re amerikane, Yuri Kim do të prezantohet sot me krerët e klasës politike, kryetarët e bashkive, prokurorë dhe gjyqtarë. Për këtë arsye, ajo ka thirrur në takim emrat kryesorë të politikës dhe gjyqësorit, ku bien në sy Lulzim Basha dhe Sali Berisha.
Në takimin që do të mbahet me rastin e prezantimit të ambasadores së re do të jetë e pranishme edhe ministrja e Ramës, Etilda Gjonaj. Gjithashtu Kim ka ftuar edhe deputetë të tjerë të qeverisë dhe opozitës.
Nuk dihet ende nëse pjesë e këtij takimi do të jetë edhe kryeministri Edi Rama.
Ambasadorja e re amerikane e ka nisur me takime të ngjeshura axhendën e saj në Shqipëri, teksa pas takimeve individuale do të bëjë edhe një pritje për t’u prezantuar me krerët e politikës shqiptare dhe asaj të drejtësisë, dy sisteme ndaj të cilat Uashingtoni kërkon me ngulm që të pastrohen nga elementët kriminalë.
Yuri Kim i hyn me themel: Jemi përkrah SPAK-ut kundër krimit të organizuar
Vetëm pak ditë pasi zbarkoi në Shqipëri, ambasadorja e re e Shteteve të Bashkuara të Amerikës, Yuri Kim i ka dhënë mbështetje kategorike institucioneve të reja të drejtësisë që janë ngritur për të luftuar krimin e organizuar.
Pasi ambasadorja mori kredencialet nga presidenti Ilir Meta dhe takoi ministrat kyç të kabinetit Rama, Yuri Kim e ka shtrirë axhendën e takimeve edhe tek njerëzit e rinj të drejtësisë.
Ajo takoi fillimisht kryeprokurorin Olsian Çela, i cili gjithashtu mori mbështetjen amerikane në drejtimin e prokurorisë së përgjithshme, ndërsa sot Kim ka zbarkuar në zyrën e kreut të Strukturës së Posaçme Antikorrupsion, Arben Kraja.
Ky institucion është edhe shtylla mbi të cilën do të ngrihet i gjithë procesi i hetimit, gjykimit dhe vendosjen përpara drejtësisë të ‘peshqve të mëdhenj.’ Këtij institucioni pritet t’i bashkohet edhe Byroja Kombëtare e Hetimit për të cilën amerikanët do të japin ndihmën teknike në mënyrë maksimale, pasi ajo do të jetë sipas modelit të FBI-së amerikane.
“Takimi i sotëm i Ambasadores së Shteteve të Bashkuara Yuri Kim me prokurorët e Zyrës së Prokurorisë së Posaçme ofroi një mundësi të shkëlqyer për të shkëmbyer pikëpamjet mbi ndihmën e vazhdueshme teknike të Shteteve të Bashkuara, ndërsa ata përballen me krimin e organizuar dhe hedhin hapat e para për të themeluar Byronë Kombëtare të Hetimit. #ShbaQendronKrahShqiperise”, shkruan në Facebook ambasada amerikane.
