Një shqiptar është përplasur me armë me policinë italiane teksa ka qëlluar në drejtim të saj në një pikë kontrolli në Colonnella, shumë pranë një qendre tregtare. Shqiptari ka hapur dritaren e makinës dhe ka qëlluar 2-3 herë në drejtim të karabinierëve.
Policët i janë kundërpërgjigjur duke hapur zjarr ndaj tij dhe më pas u vunë në ndjekje të shqiptarit. Sipas mediave italiane, shqiptari u fut në një fshat, dhe vodhi një skuter të një fermeri. Më pas ndaloi një shofer të çastit, të cilin e kërcënoi me armë duke i marrë edhe Mercedesin e tij. Pas grabitjes shqiptari u nis veriut në zonën e Askolanos.
I ndjekur nga policia, atij iu desh të braktiste makinën. Arratia e shqiptarit nga policia mori fund kur u ndal në Piceno. Sipas mediave italiane ende nuk dihen shkaqet se përse ai hapi zjarr ndaj policisë, por dyshimet i çojnë autoritetet italiane tek një ngjarje që lidhet me një grabitje, shkruan Il. Giornale.
Makina e parë me të cilën udhëtonte shqiptari e llojit “Toyota Yaris”, ka të bëjë me një grabitje të datës 23 janar. Ndërkaq, policia italiane ka arrestuar edhe një grua nga Shqipëria. Ajo dyshohet si bashkëpunëtore e shqiptarit, ndërsa një tjetër, po ashtu shtetas shqiptar kërkohet nga autoritetet italiane si bashkëpuntor i autorit të përplasjes me policinë. /Fjala.al/
