Kapitoli në SHBA është mbyllur pasi një i dyshuar përplasi makinën e tij me një barrierë mbrojtëse, duke plagosur rëndë dy policë dhe më pas thuhet se doli me thikë para se të qëllohej.
I dyshuari nuk është identifikuar ende por ai është në paraburgim, gjithashtu në gjendje të rëndë.
Sipas NBC, ka zëra që ai ka vdekur, por policia e Kapitolit ende nuk e ka konfirmuar këtë.
Rreth orës 1.10 pasdite, kaosi përfshiu papritur Kapitolin ndërsa agresori u lëshua me makinë duke shtypur dy policët, përpara se të ndalonte. Dy policët e plagosur u morën me barela dhe tani janë në spital në një gjendje kritike.
Një reporter i Washington Post shkroi në Twitter se i dyshuari më pas doli nga makina duke mbajtur një thikë, para se të qëllohej nga një oficer tjetër.
