Politika të reja çmimesh nga ana e Ministrisë së Kulturës. Nga viti i ardhshëm do kemi një rritje të çmimit të biletave për hyrjen në muze dhe në parqet arkeologjike.
Në një intervistë televizive, ministrja e Kulturës, Elva Margariti, bëri të ditur se ka qenë kërkesë e institucioneve të varësisë, pasi çmimet ishin shumë të ulëta dhe nuk përballonin mirëmbajtjen e tyre.
“Çmimet kanë qenë vërtet të ulta, flasim për bileta 100 lek për një hyrje, të cilat asnjëherë nuk kanë arritur të garantojnë totalisht mirëmbajtjen e siteve. Kështu që kemi ndërmarrë disa procedura, kemi hartuar disa varjante apo skenarë të mundshëm, për të arritur atë që themi së është nevoja imediate. Këto institucione, këto monumente duhet të vetëmirëmbahen dhe jo gjithmonë të agravojnë mbi buxhetin e shtetit”
Ministrja Margariti foli edhe për kategoritë që përfitojnë çmime të reduktuar apo biletë falas për të hyrë në muze dhe në parqet arkeologjike.
“Kemi shtuar kategorinë e fëmijëve të vegjël, e cila ishte deri në 8 vjeç por që e çuam deri në 12 vjeç. Kategorinë 12 deri 18 e kemi ulur çmimin deri në 70 pëqind, karta e studentit i është bashkuar kësaj nisme, dhe ajo është me reduktim 70 përqind. Kemi shtuar invalidët e luftës, ish të përndjekurit, veteranët, paraplegjikët dhe shoqëruesit e tyre”
Për herë të parë do të aplikohet bilateria online. Maragariti tha se në fokus nuk është vetëm e ardhmja ekonomike, por politika për të afruar sa më shumë njerëzit me sitet e trashëgimisë kulturore.
“Ne këtë vit kemi arritur mbi një milion vizitorë. Është hera e parë që sitet e trashëgimisë kulturore arrijnë një shifër të tillë”
Ministrja e Kulturës, Margariti, tha gjithashtu se një instrument i rëndësishëm është edhe monitorimi, për të qenë transparent dhe për të marrë masa në raste shkeljesh./ Fjala/al
