Një familje shqiptare me 5 anëtarë ka humbur çështjen në një Gjykatë Apeli në Irlandë, ku kundërshtuan vendimin e deportimit në Shqipëri. Shtetasit shqiptarë i përkasin komunitetit rom, por ata kishin mbërritur në vitet 2005 dhe 2008 në Irlandë dhe aplikuan për azil.
Duke cituar mediat irlandeze, shtetasit shqiptarë e kishin identifikuar veten si pjesë të “grupit etnik gabel”, dhe frikësoheshin për jetën e tyre në Shqipëri. Babai i familjes pretendonte se vëllai i tij ishte martuar në vitin 2004 me një grua jo-rome, por familja e nuses nuk e pranoi martesën dhe e vrau.
Sipas asaj që deklaronte përpara autoriteteve irlandeze burri me shtetësi shqiptare, denoncimi nuk u bë në polici për vrasjen sepse “një anëtar i grupit gabel (në Shqipëri) nuk mund të shkonte në polici pasi do të keqtrajtohej dhe familja e viktimës do të hakmerrej”.
Edhe pse termi “gabel” është racist dhe nuk ekziston në legjislacionin shqiptar, anëtarët e familjes identifikoheshin vazhdimisht si të tillë.
Por ky pretendim i shtetasve shqiptarë nuk i ka bindur autoritetet irlandeze, të cilat kanë marrë vendim për deportimin e tyre në Shqipëri. Edhe pas disa vitesh betejë ligjore, familjes me shtetësi shqiptare iu mohua e drejta e kthimit në Irlandë me vendimin e marrë së fundmi nga Gjykata e Apelit./Fjala.al
*Termi “gabel” është përdorur nga vetë shtetasit shqiptarë gjatë aplikimit për azil në Irlandë
