Kryeprokurori Çela: Destinacioni final është shteti ligjor

“Destinacioni final është shteti ligjor dhe kthimi i  besimit të publikut te drejtësia”. Këtë mesazh përcolli prokurori i përgjithshëm, Olsian Çela, në konferencën e përbashkët për rritjen e bashkëpunimit të institucioneve. Sipas tij, mbledhja e provave nga institucionet publike dhe jopublike do të ulë kohën e hetimit dhe do të rrisë efikasitetin e drejtësisë. “Janë marrë masa në forcimin e kapaciteteve institucionale sa i takon krimit financiar dhe aseteve financiare. Koordinimi mes PP dhe SPAK do të ndihmojë. Janë nënshkruar morandume edhe me ILD. Mbledhja e provave nga institucionet publike dhe jopublike do të ulë kohën e hetimit, do të shkurtojë shpenzimet dhe do të rrisë efikasitetin”, tha Çela në këtë tryezë. Sa i takon vakancave të përkohshme, Çela sugjeroi shtimin e oficerëve të policisë gjyqësore. “Po krijohen vakanca të përkohshme. Shtimi i oficerëve të policisë gjyqësore do të ndihmojë në vakancën e krijuar. KLP dhe PP të japin kontributin në funksion të përmbushjes së punës së prokurorit të Përgjithshëm për mbarëvajtjen”, tha kryeprokurori i Përgjithshëm. Duke pranuar sfidat e shumta që shtrohen përpara drejtësisë, ai tha se duhet të ecet përpara me vështrim kritik. “Sfidat janë të shumta dhe në disa plane. Rritja e performancës kushtëzohet nga interpretimi pozitiv mes tyre, largpamësi dhe të ecim përpara me një vështrim kritik”, tha ai.