Kanë përballë një emër të madh si Juventus, por nuk kanë frikë. Futbollistet e Vllaznisë janë përgatitur në mënyrën e duhur që ta kalojnë edhe këtë pengesë ditën e mërkurë, kur në orën 19 në Loro Boriçi do të përballen në ndeshjen e parë të raundit të dytë të Çempions Ligës për femra.
Trajneri i shkodraneve Nikolin Leka është i bindur se pavarësisht emrit që kanë përballë, skuadra e tij nuk është rastësisht mes 32 ekipeve më të mira të kontinentit
Për kapitenen Esmeralda Franja, emri i Juventusit është një motivim më shumë, prandaj vajzat do të kërkojnë të arrijnë fitoren që në ndeshjen e parë duke patur edhe mbështetjen e tifozëve.
Ndeshja e kthimit do të luhet në Torino pas një jave dhe skuadra që kualifikohet do të hyjë në fazën e grupeve.
Shkodranet do të synojnë të përsërisin suksesin e dy sezoneve më parë, kur u renditën mes 16 skuadrave më të mira të Europës.
