Të ardhurat e mbledhura për periudhën janar-shtator kanë tejkaluar planifikimin fillestar të bërë nga Ministria e Financave. Sipas të dhënave fiskale të publikuar këtë të enjte thuhet se deri në fund të shtatorit u mblodhën 367 miliardë, ose rreth 58.9 miliardë lekë më shumë se në vitin e kaluar.
Të ardhurat tatimore (të ardhurat nga TVSH neto në vend, tatimi mbi fitimin, tatimi mbi të ardhurat personale, taksat nacionale dhe kontributet e mbledhura nga DPT), për 9-mujorin 2021 u realizuan në masën 183.4 miliardë lekë, 22.8 miliardë ose 14.2% më shumë se 9-mujori i vitit të kaluar, si dhe 2.6 miliardë lekë, ose 1.4% më shumë se plani i 9-mujorit 2021.
Ndërsa të ardhurat doganore (të ardhurat nga TVSH në import, akciza, taksa doganore dhe renta minerare) u realizuan në vlerën 135,9 miliardë lekë, 26.6 miliardë lekë ose 24.3% më shumë se 9 mujori 2020, si dhe 12.6 miliardë lekë ose 10.2% më shumë se plani i të ardhurave doganore për 9 mujorin e vitit 2021. Të ardhurat doganore të 9 mujorit 2021 janë ndikuar kryesisht nga rritja e volumit të importit,i cili ka sjellë rritje të të ardhurave 23.9 miliardë lekë ose 24.3 % më shumë krahasuar me 9 mujorin 2020.
Nga ana tjetër janë rritur me 9.6% edhe shpenzimet sipas financave.
“Shpenzimet e përgjithshme publike, për periudhën 9 mujore të vitit 2021, arritën në rreth 403 miliard lekë me një realizim në masën 93.8 përqind të planit të periudhës, ndërsa krahasuar me të njëjtën periudhë të vitit 2020 ky zë është rezultuar 9.6 përqind më i lartë ose rreth 35.4 miliard lekë më shumë. Në terma vjetorë, shpenzimet e përgjithshme për 9 mujorin e vitit 2021 u realizuan në masën 68 përqind të planit vjetor fillestar dhe 66.1 përqind të planit vjetor të ndryshuar me Aktin Normativ nr.26, datë 22.06.2021”, thuhet në njoftimin e Ministrisë së Financave.
