Dosja e lobimit të Lulzim Bashës ka rënë në duart e Fatmira Hajdarit. Kjo e fundit do të drejtojë trupën gjykuese e përbërë nga Alaudin Malaj dhe Shpresa Beçaj.
Hajdari do të gjykojë çështjen e lobimit në SHBA të Partisë Demokratike dhe figurës së vetë Lulzim Bashës, përmes parave të dyshimta që rridhnin nga Moska.
Edhe pse shkalla e parë e pushoi çështjen ndaj Bashës dhe Ristanit prokuroria e apeloi vendimin, ndërsa tashmë shorti e ka dërguar kryedemokratin në duart e bashkëshortes së ish-liderit të Dhjetorit Azem Hajdari.
Duke iu përmbajtur afateve të apelimit të vendimit të gjykatës së Tiranës, prokuroria kërkon një proces tjetër ndaj kryedemokratit Lulzim Basha.
Pjesë e procesit bashkë me Lulzim Bashën, janë edhe ish-sekretari i Përgjithshëm, Arben Ristani dhe financieri i selisë blu Ilir Dervishi.
Të tre zyrtarët e PD-së edhe pse u shpallën të pafajshëm nga gjykata e Tiranës, do të jetë Gjykata e Apelit tashmë që do të shqyrtojë dosjen e Lulzim Bashës me në krye gjyqtaren Fatmira Hajdari.
Akuza e Prokurorisë për Bashën, Ristanin dhe Dervishin është e përqendruar tek falsifikimi i formularëve lidhur me shumën e financuar prej 675 mijë dollarësh në favor të lobimit të PD-së në SHBA.
Një nga pikat të cilat anashkaloi gjykata e Tiranës ishte edhe mosmarrja e dëshmisë së lobisitit amerikan Nick Muzin, i cili është edhe njeriu që ka nënshkruar kontratat e lobimit me kreun e Partisë Demokratike Lulzim Basha.
Tashmë pritet se cili do të jetë gjykimi i gjykatës së apelit, nëse do të lërë në fuqi vendimin e gjykatës së shkallës së parë apo do ta rikthejë atë për të rigjykim në themel, duke qenë se sipas prokurorisë duhet thirrur për të dëshmuar edhe lobisti amerikan i Lulzim Bashës, Nick Muzin./Fjala.al/
