Ish-ministrja e jashtme Arta Dade, gjatë një emisioni në Abc News, ka folur për kryesimin e Shqipërisë në OSBE. Ajo ka akuzuar kryeministrin Rama se shkon me rolin e kryetarit por përfundon duke bërë PR e vetes.
Dade u shpreh se këto takime që Rama i kërkon, nuk janë asgjë më shumë se sa një reklamë personale e Ramës në sytë e liderëve botërorë.
Ish ministrja tha se Rama mund të kishte ngelur i zhgënjyer edhe nga Gent Cakaj, prandaj nuk e ka dërguar më në takime zyrtare.
Arta Dade ka folur edhe për paketën ‘Anti-KÇK’, duke e quajtur të turpshme se si legjislacioni shqiptar mund të ketë ligje me të tillë emra.
Për më tej ajo tha se është e paimagjinueshme se si mund të shkojë Rama dhe të bisedojë me Merkel apo ndonjë lider tjetër për të tilla ligje me këto emra, kur duhet të arsyetojë se çfarë e pengonte në 7 vite si kryeministër të merrte të tilla hapa.
Duke u ndalur te marrja e Presidencës së OSBE, Dade theksoi se Shqipëria nuk ishte zgjedhja e parë, por u favorizua nga tërheqja e Norvegjisë dhe Republikës Çeke.
Ish-ministrja e jashtme ka folur edhe për takimin e Ramës me Kurtin, ku shprehet se ky është një fillim i ri për kryeministrin shqiptar, pas marrëdhënieve të tensionuara me Haradinajn, por duhet që marrëveshjet të mos mbeten vetëm në letra.
