Fondet buxhetore për financimin e pasojave të tërmetit do të jenë gjithsej 27 miliardë lekë për të gjithë periudhën e rindërtimit. Sipas të dhënave zyrtare të Ministrisë së Financave, nga kjo shumë 20 miliardë lekë janë fonde që do të rrjedhin nga buxheti i këtij viti, 5 miliardë lekë janë financime që do të ndahen në buxhetin e vitit 2021 dhe 2 miliardë lekë janë financime që do të akordohen në vitin 2022. E gjithë shuma, që do të financohet nga taksat e shqiptareve nëpërmjet buxhetit të shtetit, përllogaritet 220 milionë euro. Ky financim do të mbulojë rreth 20 për qind të kostos totale të dëmeve të shkaktuara nga tërmeti i 26 nëntorit të përllogaritura nga qeveria shqiptare në bashkëpunim me donatorët. Praktikat e kaluara kanë treguar se donatorët mund të financojnë maksimumi 30 për qind të kostove që shkaktohen nga fatkeqësi të tilla. Nga ana tjetër qeveria vendosi të zgjerojë deficitin buxhetor me rreth 30 miliardë lekë për tre vitet në vijim me qëllim financimin e pasojave të tërmetit të 2016 nëntorit 2019.
Sipas Ministrisë së Financave këtë vit deficiti buxhetor arrin në 2.2 % të PBB-së nga 1.6% që ishte parashikuar para tërmetit, duke e zgjeruar masën e borxhit me 10 miliardë lekë (81 mln euro), shumë kjo që do të përdorej për financimin e nevojave të tërmetit.
I gjithë procesi i rindërtimit që do të kalojë në tre faza pritet të përfundojë në vitin 2023, ndërsa këtë vit dhe vitin tjetër pritet të përfundojë njësitë e strehimit të cilat kane edhe koston më të madhe, prej 800 milionë eurosh.
Komiteti Kombëtar për Rindërtimin deklaron se nga 51 mijë banesa të inspektuara, 8925 prej tyre janë të pabanueshme. Ndërkohë, po vijon procesi i vlerësimit të thelluar për dëmet e shkaktuara nga tërmeti në banesa në mbarë vendin.
Ministri për Rindërtimin tha se janë 357 pallate të inspektuara thellësisht nga të cilat 115 janë për t’u shembur. Sa i përket shtëpive individuale, sipas Ahmetajt, janë më shumë se 1500 të tilla që duhen shembur. Procesi i vlerësimit të thelluar vijon edhe më tej. Në çadra janë më shumë se 10 mijë qytetarë, ndërsa 12 mijë të tjerë po përfitojnë nga bonusi i qirave. Ndërkohë, në portalin unik ‘shtëpiaime’ që është hapur për këtë proces deri më tani janë më shumë se 14 mijë aplikime. Ahmetaj saktësoi se aplikimi në portal është procesi detyruar ligjor në mënyrë që të përfitohet nga procesi i rindërtimit
