Të paktën 34 mjete të blinduara janë bllokuar, prej çastit kur Policia nisi aksionet në terren. Pas çdo rasti të dyshimtë, ku përdoruesi i tyre nuk disponon dokumentacionin, apo kur policia ka pasur dyshime për mosjustifikim të burimeve monetare, atëherë çështja i ka kaluar Operacionit “Forca e Ligjit”.
OFL ka verifikuar nëse automjetet e blinduara janë blerë me para që burim kanë aktivitetet kriminale. Nga ana tjetër një urdhër i ministrit të Punëve të Brendshme, Sandër Lleshaj, për Drejtoritë Rajonale të Shërbimit të Transportit Rrugor, specifikon se do të ndalohet targetimi i makinave të blinduara për persona fizik si dhe nuk do të rinovohet dokumentacioni i mjeteve që aktualisht janë në qarkullim.
Në Shqipëri, rezultojnë të jenë 470 automjete të blinduara, sipas Drejtorisë së Shërbimit të Transportit Rrugor. Nga këto, 118 janë autovetura dhe fuoristrada në përdorim të qytetarëve, ndërsa pjesa tjetër janë të kompanive private.
Pjesa më e madhe e makinave të blinduara janë të regjistruara më së shumti në qytetet e mëdha si Tirana, Durrësi, Fieri dhe Vlora.
Por si regjistrohen automjetet e blinduara?
Për regjistrimin dhe pajisjen me targa e leje qarkullimi të një autoveture të blinduar, përveç dokumentacionit të nevojshëm që kërkohet për një autoveturë të zakonshme siç janë dokumentet e origjinës, shit/blerjes dhe doganës kërkohet dhe një dokument shtesë. Ky dokument është një autorizim i cili për personat fizik lëshohet nga Drejtoria Vendore e Policisë ndërsa për subjektet nga Drejtoria e përgjithshme e e Policisë së Shtetit.
Ndërkohë vetëm një ditë më parë OFL ka bllokuar 6 makina të blinduara në Durrës të cilat rezultonin në pronësi të Xhevdet Troplinit, Bledin Doçi, Ervis Doçit, Ilir Gjyzelit. Ndërsa më herët OFL ka sekuestruar automjetet e Dashamir Gjokës, Durim Bamit, Saimir Taullait, Landi Muharremit.
