Krishtlindjet po afrohen me shpejtësi dhe si një dejà vu, lajmet dominohen sërish nga rastet në rritje të Covid-it. Vitin e kaluar, gëzimi ynë festiv u zbeh pasi kufizimet u vendosën vetëm disa ditë para ditës së Krishtlindjes. Këtë vit, ne mund t’i kalojmë festat me miqtë dhe familjet tona, por rastet e variantit Omicron janë ende në rritje dhe si rezultat është prezantuar plani B i mbrojtjes nga infektimi.
Shumica e festave të Krishtlindjeve në punë janë anuluar, ndërsa udhëzimi për punën nga shtëpia është rifutur sërish, gjithashtu është rekomanduar mbajtja e maskave në ambiente të mbyllura. Shumë janë të shqetësuar për vendosjen e kufizimeve të mëtejshme. Për t’i dhënë vetes mundësinë më të mirë për të shijuar një Vitin e Ri ‘normal’, këtu janë disa këshilla që do t’ju ndihmojnë të qëndroni të sigurt nga Covid-i gjatë sezonit të fundvitit.
Merrni një vaksinë përforcuese
Boris Johnson e ka quajtur programin përforcues një nga format kryesore të mbrojtjes së Britanisë nga Omicron. Prej kësaj jave në Angli kjo vaksinë do t’u ofrohet të gjithë atyre që janë mbi 18 vjeç. Ju mund të merrni vaksinën tuaj përforcuese për Covid-19 nëse e keni bërë vaksinën tuaj të dytë të paktën tre muaj më parë.
Punoni nga shtëpia (nëse mundeni)
Për dy muajt e fundit, shumë në Angli kanë shijuar punën hibride duke shkuar në zyrë me kohë të pjesshme, pasi mandati zyrtar i punës nga shtëpia u anulua. Por tani, këshilla është të punoni edhe një herë nga shtëpia, nëse mundeni. Udhëzimi i qeverisë thotë se “punonjësit e zyrës që mund të punojnë nga shtëpia duhet ta bëjnë këtë”. Për më tepër, ai thotë se njerëzit duhet të shkojnë në punë kur roli i tyre duhet të kryhet personalisht”.
Vetëizolohuni kur është e nevojshme
Udhëzimi i qeverisë për izolimin thotë se duhet të izoloheni sapo të vini re se keni simptoma të Covid-19. Ju duhet të bëni një test PCR dhe të izoloheni nëse rezultatet janë pozitive. Kërkesat e reja thonë se nëse jeni vaksinuar me të dyja dozat dhe keni qenë në kontakt me një rast Omicron, do t’ju kërkohet të bëni teste ditore. Vetëm njerëzit që kanë rezultuar pozitivë do të izolohen.
Bëni teste përpara se të vizitoni anëtarët e familjes vulnerabël
Këshilla e qeverisë rreth testeve është se njerëzit duhet të bëjnë një test përpara se të hyjnë në “hapësira të brendshme të mbushura me njerëz”. Megjithatë, ju gjithashtu mund të luani rolin tuaj duke u testuar përpara se të shihni anëtarët e pambrojtur të familjes.
Bëni online blerjet
Edhe pse festa është disa ditë larg, shumë prej nesh kanë ende disa dhurata për të blerë. Me kaq shumë opsione blerjesh në internet, nuk është e nevojshme të shkoni fizikisht në dyqane. Shmangni dyqanet dhe blini nga komoditeti i shtëpisë tuaj.
Mbani një maskë
Rregullat për veshjen e maskave kanë ndryshuar si rezultat i variantit Omicron. Në konferencën e tij për shtyp në Downing Street më 27 nëntor, Boris Johnson deklaroi se mbulimi i fytyrës do të bëhej i detyrueshëm në dyqane dhe në transportin publik për të ndaluar përhapjen e variantit të ri. Rregullat që atëherë janë zgjeruar dhe maskat tani kërkohen pothuajse në të gjitha mjediset e brendshme. Ndërsa maskat kryesisht mbrojnë njerëzit e tjerë nga transmetimi i grimcave Covid, hulumtimet tregojnë gjithashtu se ato rrisin mbrojtjen për mbajtësin.
Njihni dallimin mes të ftohtit dhe Covid-19
Është dimër që do të thotë se mund të jetë e vështirë të dallosh ndryshimin midis një të ftohti dhe Covid-19.
Simptomat e ftohjes shfaqen gradualisht dhe sipas NHS, mund të përfshijnë:
- hundë e bllokuar ose rrjedhje
- dhimbje të fytit
- dhimbje koke
- dhimbjet e muskujve
- kollë
- teshtitje
- temperaturë
- presion në veshë dhe fytyrë
- humbje e shijes dhe erës.
Simptomat tradicionale të Covid kanë qenë:
-një temperaturë e lartë – kjo do të thotë se ju ndiheni të nxehtë kur prekni gjoksin ose shpinën tuaj (nuk keni nevojë të matni temperaturën tuaj)
-një kollë e re, e vazhdueshme – kjo do të thotë që kolliteni shumë për më shumë se një orë (nëse zakonisht keni kollë, kjo mund të jetë më keq se zakonisht)
-një humbje ose ndryshim në shqisën tuaj të nuhatjes ose shijes – kjo do të thotë se keni vënë re se nuk mund të nuhasni ose shijoni asgjë, ose gjërat kanë erë ose shije të ndryshme nga normalja.
Por simptomat e Omicron (dhe Delta), si dhe simptomat e Covid pas vaksinimit mund të përfshijnë:
Lodhje
Dhimbje trupi
Dhimbje koke
Teshtitje
Kollë e lehtë
Kongjestion i hundës.
Qëndroni në shtëpi nëse nuk ndiheni mirë dhe bëni një test PCR për të zbuluar nëse simptomat tuaja mund të jenë të Covid.
Refuzoni ftesat në raste sociale
Me rritjen e rasteve të variantit Omicron është e rëndësishme që të përdorim maturi kur ndjekim ngjarje sociale. Nëse dëshironi të zvogëloni rrezikun për t’u prekur nga virusi, gjithmonë mund të refuzoni disa ftesa sociale.
Shmangni tubimet e mëdha
Profesor Paul Hunter, një ekspert në sëmundjet infektive në Universitetin e Anglisë Lindore tha: “Viruset e frymëmarrjes priren të përhapen më pak, kur përzihemi më pak me njerëzit sesa gjatë një dite normale pune ose shkolle. Por festat janë një gjë tjetër dhe sigurisht që do të rrisnin rrezikun e transmetimit”. Përpiquni të kufizoni sasinë e tubimeve të mëdha gjatë festës.
Vazhdoni larjen e duarve dhe distancimin social
Ne nuk mund të neglizhojmë gjërat e vogla që bëjnë një ndryshim të madh në luftën kundër Covid-19. Ne duhet të vazhdojmë t’i japim përparësi larjes së duarve dhe distancimit social kur është e nevojshme. Megjithëse tashmë e dimë se kontakti sipërfaqësor nuk është shkaku kryesor i përhapjes së Covid-it, NHS thotë se duhet t’i lajmë duart me ujë të ngrohtë dhe sapun për aq kohë sa duhet për të kënduar këngën Happy Birthday dy herë. Kjo është rreth 20 sekonda. Kur jeni në publik, përpiquni të mbani një distancë prej një deri në dy metra midis jush dhe njerëzve të tjerë.
Ajrosni shtëpinë
Po, është ftohtë, por hapja e dritareve për disa minuta ose më shumë mund të kufizojë përhapjen e virusit. Mjekët dhe shkencëtarët kanë mbështetur një fushatë mbarëkombëtare të financuar nga qeveria për t’i bërë të gjithë të hapin dritaret e tyre 10 minuta çdo orë gjatë dimrit. Covid mund të krijohet në hapësira të mbyllura nëse një person i infektuar po flet me një person tjetër, duke rritur mundësinë e transmetimit, kështu që rritja e qarkullimit të ajrit në shtëpinë tuaj do ta shtyjë virusin të dalë jashtë.
Riktheni festat përmes Zoom
Zoom-i miku ynë i vjetër. Me kalimin e muajve, ne mund të kemi harruar kohën e izolimit, por mund të jetë koha për ta rikthyer atë. Jo të gjithë do të ndihen rehat duke u përzier me të tjerët këtë festë, kështu që është një ide e mirë të përdorni festat përmes Zoom.
Burimi: huffingtonpost.co.uk
