Dënimi i ish-ministrit të Brendshëm Saimir Tahiri, me tri vite e katër muaj burgim, trazon politikën në vend për “mëkatet” e 30 viteve. Çfarë tregoi dënimi i Tahirit dhe a mund të jetë ish-zyrtari i lartë që do i hapë rrugë edhe të tjerëve? Për gazetën “Fjala” komentojnë analistët Lorenc Vangjeli, Plator Nesturi dhe Erald Shulla.
Nga Fernada Cenko
Ndërsa gjyqtari mbante sytë në letrën dhe lexonte rrjedhshëm çfarë kishte shkruar bashkë me dy kolegët, Saimir Tahiri me nënqeshje instiktive pësoi tronditjen e parë kur iu komunikua se Gjykata e Posaçme e Apelit Kundër Korrupsionit dhe Krimit të Organizuar e dënoi me 3 vite e katër muaj burgim. Ai nuk doli nga salla e gjyqit i lirë, por me pranga në duar, duke vënë në pozitë jo të vogël edhe efektivët e policisë që dikur, jo shumë larg e nderonin si “eprorin e madh”. Dëshira e “fundit” e ish-ministrit më jetëgjatë që pas vitit 1991, ishin porosia për dy paketa cigaresh. Dje,Tahiri bëri udhëtimin Tiranë-Fier në një furgon të mbyllur, i shoqruar me katër motorë policie dhe një autoveturë patrullimi. Burgu i sigurisë së zakonshme në Fier është streha e re, pa e ditur se përsa kohë. Para vendimit ai parandjeu diçka, po përse? E dinte se “ishte fajtor”? E dinte se duhej dënuar si “trofe” për reformën e re të drejtësisë? Apo duhej dënuar se politikisht sulmohej nga çdo anë? Këto pyetje vështirë se do dalin të paktën të sinqerta nga Tahiri. Me dënimin e tij duke e gjykuar fare ftohtë të gjithë zyrtarë të lartë apo ish-zyrtarë nuk duhet të flenë aq qetë, gjithnjë nëse drejtësia ka vepruar në “kokën e vet”, pranë në shqyrtim të fakteve dhe provave. Nëse do futeshin në gjykim shifrat nuk janë në favor të tij, pasi thuajse çdo ditë që Saimir Tahiri qëndronte në postin e Ministrit të Brendshëm iu konvertua në ditë burgu. Ai qëndroi për 3 vite e gjashtë muaj në krye të Ministrisë së Brendshme, shtator 2013-mars 2017, por pesë vite pasi u shkarkua nga detyra, iu komunikua vendimi se do të dënohej me tri vite e katër muaj burgim për akuzën e “shpërdorimit të detyrës”. Dënimi i Tahirit ka rritur pritshmëritë e qytetarëve të zhgënjyer që vetëm ankohen se thuajse të gjithë politikanët, pa dallim ngjyre janë abuzues me pushtetin dhe të korruptuar. Ata shpresojnë që drejtësia të funksionojë pa hesape politike, pa duar të zgjatura ndërkombëtarësh. Kushdo qoftë arsyeja e dënimit të ish-ministrit të Brendshëm të paktën për disa kohë dissave ua ka prishur gjumin, dikur kolegë të një llogoreje të Tahirit, apo kundërshtarë të tij. Mbi dënimin e Tahirit, arsyet, ndikimet apo interpretimet ligjore dhe politike komentojnë për gazetën “Fjala”, analistët Lorenc Vangjeli, Plator Nesturi dhe Erald Shulla.
Lorenc Vangjeli: Dënimi i Tahirit? Nga dy paketa cigare Berishës dhe Bashës
Erald Shulla: Nëse duam drejtësi, koha e padrejtësisë duhet të marrë fund
Plator Nesturi: Vendimi Tahiri tregon se “steka e gjykimeve” do të ngrihet lart
