U bënë disa javë që kryesisht tabloidët, por edhe disa media britanike që në qendër te fokusit të tyre kanë kalimet joligjore nga Franca drejt Anglisë, duke e interpretuar si dështim të qeverisë aktuale britanike dhe si shembull marrin emigrantët shqiptarë që nuk vijnë nga një zonë lufte apo konflikti.
Madje së fundmi, Daily Mail i kushtoi edhe një reportazh Hasit, që sipas tyre po zbrazet, pasi djemtë ikin në Britani.
Sakaq, një investigim po ashtu në ‘Mail on Sunday’ ka zbuluar së fundmi se emigrantët shqiptarë kanë gjetur një rrugë tjetër për të shkuar në Angli, jo me kamion e gomone, por me jahte luksoze.
Një trafikant i ofroi atij një vend në një jaht që largohej nga Belgjika këtë fundjavë për 17,000 £, ndërsa një tjetër tha se kishte vend në një jaht që nisej nga afër Calais për 16,000 £.
Top Channel i referohet ‘Mail on Sunday’, e cila shkruan se një raport i fundit ushtarak tregon se katër në dhjetë emigrant që kalojnë në Kanalin Anglez gjatë kësaj vere, janë me prejardhje shqiptare.
Trafikantët e qenieve njerëzore po përdorin rrjetin social TikTok për të ‘joshur’ emigrantët që të shkojnë në ishull me jahte luksoze dhe mos të rrezikojnë jetën me varka e gomone.
Detektivët në Holandë thonë se kanë pikasur trafikantët të cilët synojnë Britaninë me jahtet luksoze përgjatë një shtrirje prej më shumë se 100 miljesh të vijës bregdetare holandeze nga Vlissingen në jug deri në Den Helder në veri.
Javën e shkuar janë identifikuar tre trafikantë, të cilët përdorin rrjetin social TikTok për të gjetur emigrant të cilët duan të shkojnë në Britani me jaht, duke kaluar nga porti i Francës, Belgjikës dhe Holandës.
Një nga trafikantët postoi foto të anijeve luksoze, ndërsa e reklamonte “rrugën e sigurt” në shqip ‘udhëtim në Angli çdo dy ditë’.
Mail on Sunday shkruan në fund të artikullit se dyshohet që emigrantët shqiptarë të trafikuar në Britaninë e Madhe, janë të të detyruar të punojnë si ‘skllevër’ për kriminelët e organizuar.
