Kryeministri Edi Rama po viziton Moskën në cilësinë e Kryetarit të OSBE-së.
Rama do të pritet në një takim të veçantë nga ministri i jashtëm rus Sergey Lavrov.
Çështja e integrimit evropian do të jetë pjesë e diskutimeve në tryezën mes Ramës dhe Lavrov.
Shqipëria pritet të marrë edhe një përgjigje nga lideret e unionit për hapjen e negociatave.
Në njoftimin e Ministrisë së Jashtme ruse thuhet se do të diskutohet edhe për çështjet rajonale, pjesë e së cilës është edhe minishengeni ndërmjet Tiranës, Shkupit dhe Beogradit.
Kjo nismë rajonale ka sjellë edhe debate të forta mes Shqipërisë dhe Kosovës, shtet të cilin Rusia ende nuk e ka njohur si të pavarur.
Rama dhe Lavrov do të flasin edhe për marrëdhëniet bilaterale mes Tiranës dhe Moskës, si dhe për planin e OSBE-së për 2020.
Rama në drejtimin e kësaj organizate ka kërkuar angazhimin e të gjitha shteteteve për të vendosur paqen në zonën e konfliktit në Ukrainë.
Burime bëjnë me dije se pavarësisht lobimit nga pala shqiptare, Edi Rama ende nuk siguruar një takim me presidentin rus Vladimir Putin.
Rama është kryeministri i dytë që viziton Moskën, pasi në vitin 1995 ka qenë Aleksandër Meksi, i cili është pritur nga Kryeministri rus i asaj kohe.
