Kryeministrja e Serbisë, Ana Brnabiç, gjatë vizitës së saj në Mitrovicë të Veriut u shpreh se dëshiron të përçojë mesazhe të paqes, stabilitetit dhe tolerancës.
Brnabiç u shpreh se autoritetet nga Serbia, përfshirë presidentin Aleksandar Vuçiç, do të jenë gjithmonë me komunitetin serb në Kosovë.
“Edhe pse në Veri po qëndroj në rrethana të rënda, jam shumë e lumtur që pas provokimeve të fundit më 31 korrik kemi arritur të ruajmë qetësinë, interesi i Serbisë është qetësia dhe stabiliteti. Dëshiroj që nga këtu të dërgoj mesazhin për qetësi stabilitet dhe tolerancë, gjithashtu një porosi nga presidenti Aleksandar Vuçiç që gjithmonë do të jemi me popullin tonë në Kosovë e Metohi”, tha ajo.
Ajo theksoi se tani është koha për të formuar Asociacionin e komunave me shumicë serbe në Kosovë dhe shtoi se një gjë të tillë do ta përsërisë kudo që të shkojë nga Mitrovica në Bruksel e Pekin.
Kryeministrja e Serbisë Ana Brnabiç po zhvillon një vizitë zyrtare në Mitrovicën e Veriut. Ajo gjatë ditës së sotme zhvilloi takime me përfaqësues të listës serbe dhe qytetarët. Brnabiç u prit me duartrokitje dhe brohoritje nga qytetarët. Vizita e Brnabiçt në komunat veriore të Kosovës vjen pasi Prishtina dhe Beogradi ranë dakord për shfuqizimin e dokumenteve hyrëse-dalëse, të cilat Serbia ua lëshonte qytetarëve të Kosovës që prej vitit 2011.
