Kryeministri grek Kyriakos Mitsotakis priti në Pallatin Maximos Presidenten e Sllovakisë, Zuzana Caputova, e cila po bën vizitën e saj të parë zyrtare në Greqi.
Në takim u konfirmua niveli i shkëlqyer i marrëdhënieve dypalëshe, të cilat janë forcuar vitet e fundit, ndërsa u diskutuan çështje me interes ndërkombëtar, rajonal dhe evropian, me theks tek energjia.
Mitsotakis e falënderoi presidenten e Sllovakisë për praninë e një force të konsiderueshme sllovake në forcën paqeruajtëse të Qipros UNFICYP dhe për pozicionin parimor që ajo mban në çështjen e Qipros dhe që vendos në qendër respektimin e së drejtës ndërkombëtare dhe vendimeve të Këshillit të Sigurimit të OKB-së.
Në takim, kryeministri grek theksoi se revizionizmi dhe ndryshimi i kufijve nuk mund të tolerohen, siç tregohet nga pushtimi rus i Ukrainës. Lidhur me retorikën agresive në rritje të Turqisë, Kyriakos Mitsotakis përsëriti se qëndrimi i përhershëm i Greqisë është dialogu i bazuar në të drejtën ndërkombëtare, të drejtën ndërkombëtare të detit dhe marrëdhëniet e fqinjësisë së mirë. Ai theksoi gjithashtu se është e papranueshme që Greqia të marrë kërcënime që shkojnë deri në vënien në pikëpyetje të sovranitetit grek nga një vend që është aleat në NATO.
