Rimbursimi i TVSH-së për vitin 2019 është në vlerën e 23.5 miliardë lekë, 63% ose 9.1 miliardë lek më shumë se në vitin 2018, dhe 4.5 miliardë lekë më shumë se parashikimi fillestar. Shuma e rimbursuar e TVSH për 2009-2013 është 30.4 miliardë lekë, ndërsa për periudhën 2014-2019 kjo shumë është 54.5 miliardë lekë.
Të dhënat u bënë publike nga Ministria e Financave në raportin javor 17- 23 shkurt, ku mësohet se viti 2019 shënoi nivelin më të lartë historik i rimbursimit të TVSH-së në 10 vitet e fundit, periudhë gjatë së cilës kanë përfituar rreth 1360 biznese si: eksportues, fason, grumbullues, transport ndërkombëtar, etj. Stoku i rimbursimeve të padhëna është zeruar për herë të parë, për këtë kategori biznesesh. Synimi i MFE është që stoku i TVSH së parimbursuar të bëhet zero në mesin e vitit 2021, ndërsa për të gjithë bizneset e tjera nuk do të ketë asnjë ditë vonesë në rimbursimin e TVSH-së.
Të ardhurat
Të ardhurat e buxhetit të shtetit në vitin 2019 u mblodhën në masën 460 miliardë lekë, me një rritje prej 2.3% ose 10.4 miliardë lekë më shumë se vitit 2018. Kjo u bë e ditur gjatë një komunikimi që Ministrja Anila Denaj zhvilloi me median dhe opinionin publik. Për vitin 2019, të ardhurat totale në përqindje të PPB kanë qenë në masën 27.4%.
Ministrja tha se MFE është duke punuar edhe me FMN, me një grup të posaçëm që do të analizojë rekomandimet e ardhura për sa i përket strategjisë afatmesme të të ardhurave, me objektivin që në 5 vitet e ardhshme kjo përqindje të rritet me të paktën 4%. Të ardhurat mesatare totale të Buxhetit të Shtetit, në % të PPB, për periudhën 2014-2019, janë 27.18% nga 25.3% që ishin në periudhën 2009-2013. Të ardhurat e buxhetit në raport me buxhetin fillestar janë realizuar në masën mesatare 94.6% në 2019.
