Ministria e Mbrojtjes e Turqisë tha sot se forcat turke kanë rrëzuar dy aeroplanë të regjimit sirian në provincën Idlib. Sipas të dhënave bëhet me dije se nisma sulmuese ka ndodhur pasi këta aeroplanë kishin sulmuar aeroplanët turq. “Dy aeroplanë të tipit SU-24 të regjimit janë rrëzuar pasi i sulmuan aeroplanët tanë”-thuhet në deklaratën e kësaj ministrie.
Në njoftim gjithashtu thuhet se një sistem i mbrojtjes ajrore, i cili e rrëzoi një dron të armatosur turk, dhe dy sisteme të tjera janë shkatërruar. Turqia të dielën filloi operacionin “Mburoja e Pranverës” në Idlib pas sulmit vdekjeprurës ndaj ushtarëve turq nga forcat siriane në orët e vona të së enjtes.
Në këtë sulm mbetën të vrarë 34 ushtarë turq dhe u lënduan dhjetëra të tjerë- shkruan “Anadolu”. Pas këtij sulmi, presidenti turk, Rexhep Erdogan, ka marrë vendim që t’ua hapë dyert drejt BE-së refugjatëve sirianë, duke u arsyetuar se Turqia nuk mund ta përballojë valën e re të imigrantëve që po largohen nga Siria.
