Kryeministri i Kosovës, Albin Kurti, ka reaguar për herë të parë në lidhje me largimin e zyrtarëve serbë nga institucionet e Kosovës.
Kurti ka thënë se gjatë 20 muajve të fundit Qeveria e Kosovës ka luftuar krimin e korrupsionin, duke shkatërruar ndër të tjera gjashtë laboratorë të drogës në veri të Ibrit, e po ashtu duke ndaluar keqpërdorimin me anë të prodhimit të kriptovalutave.
“Kosova është shtet demokratik e serioz, ligjshmëria e kushtetutshmëria s’mund të kompromomentohen. S’ka individë e grup më të fuqishëm se shteti. Ne nuk i dallojmë kriminelët në bazë përkatëse etnike, por në bazë të veprave të paligjshme”, tha Kurti.
Gjithashtu, ai u ka bërë thirrje qytetarëve që të mos shqetësohen në lidhje me situatën e krijuar dhe se përpjekjet e Beogradit për destabilizimin e Kosovës do të dështojnë.
“Ftojë qytetarët serbë të vendit tonë të mos i braktisin institucionet e Kosovës, të mos japin dorëheqje, të mos i lëshojnë vendet e punës, pasi në këtë mënyrë dobësohet shërbimi ndaj qytetarëve. Ata s’kanë presion nga ne, por thirrje dashamirëse. Presioni vjen nga Beogradi që e do destabilizimin e Kosovës”, tha kryeministri i Kosovës.
