Kreu i grupit parlamentar ka komentuar protestën që do të mbajë pasditen e sotme presidenti Ilir Meta ndaj mazhorancës qeverisëse.
Duke folur nga salla e Kuvendit Balla tha se Meta nuk mund të përfaqësojë të gjithë shqiptarët.
“ Ajo që dua të vlerësoj dhe përsëri rikthehem te raporti i Komisionit, është një lajm shumë i mirë për shqiptarët, për fat të keq ditën që reforma në drejtësi u miratua bashkë me të është ngjizur edhe një aleancë e paskrupullt politikanësh të korruptuar për të bërë gjithçka për ta penguar.
Bënë gjithçka mundën deri atë ditë, por bëjnë tashmë gjithçka për ta dëmtuar, edhe ‘Besëlikja’ me Republikën e re, janë sot në të njëjtin front për të penguar çdo lloj ecje përpara për të penguar ecjen para të reformës në drejtësi dhe rrugën evropiane. Çdo protestë nuk do arrijë të pengojë këtë rrugë të historisë.
Për këtë të jenë të sigurt edhe ndonjë ‘leifen’ që vjen këtu e flet si zëdhënës i manifestimit edhe as shtangist e boksier, madje edhe gjyshja e mikut tim Bes Kallakut nuk e di çfarë është reforma në drejtësi e si mund të çohet përpara. Është një reformë që është udhërrëfyesi ynë kryesor deri në ditën e BE.
Kush mendon se kjo ditë është e largët më besoni e ka shumë gabim. Në këtë ditë të rëndësishme nga ana e Komisionit Evropian të njëjtët proeuropianë që janë kundër reformës në drejtësi përpiqen të dëmtojnë imazhin e vendit.
Kjo është shprehje e gjendjes së rëndë psikologjike që e kemi paralajmëruar 4 vite më parë, e kemi thënë se sa më shumë afrohen institucionet e reja të drejtësisë, aq më keq është. Presidenti e ka humbur të drejtën e njeriut për të përfaqësuar unitetin kombëtar, e ktheu Presidencën në seli të opozitës, tani po e legalizon këtë shkelje. Ai është një prej 4 drejtuesve të opozitës por kurrsesi President i Republikës.”-u shpreh Balla.
