Ambasadorja e Shteteve të Bashkuara të Amerikës në Shqipëri Yuri Kim ka shprehur gatishmërinë e Uashingtonit për të mbështetur në vijimësi vendin tonë, veçanërisht pas ngjarjes tragjike të tërmetit të 26 nëntorit të vitit të kaluar.
Duke folur sot në takimin e Komitetit Shtetëror të Rindërtimit, në prani të Kryeministrit Rama, për transparencën e donacioneve të dhëna për rimëkëmbjen pas tërmetit tragjik, ambasadorja saktësoi se edhe pse shuma e dhuruar nga SHBA ishte simbolike, ajo do të vazhdojë të përkrahë Shqipërinë në procesin e rindërtimit.
“SHBA janë të lumtur që jemi pjesë e donatorëve. Donacionet e dhëna janë shprehje të solidaritetit me popullin shqiptar, por përbëjnë edhe një investim simbolik e real për Shqipërinë, kështu që është kënaqësi për ne që shohim që po organizoheni për atë që duhet të jetë proces transparent”- tha ajo.
Sipas saj, “Për ne si SHBA është hera e parë që ju kemi qëndruar pranë në një moment të tillë të vështirë, por do të vazhdojmë të jemi krah jush të ofrojmë ndihmën teknike që mund tu nevojitet për tu siguruar që donacionet nga gjithë bota, por edhe tonat, të shpenzohen në mënyrën e duhur në përfitim të qytetarëve shqiptarë”.
