Në grupin CDU/CSU nuk janë aspak të kënaqur me mënyrën se si Prokuroria e Posaçme SPAK i është shmangur dosjes 184. Në këtë dosje hetimore ndodhen përgjimet dhe materialet që dyshohet se provojnë shit-blerjen e votave në bashkinë e Dibrës në zgjedhjet e parakohshme lokale të vitit 2016-të.
“Është e papranueshme që të mos hetohet vepra penale e votëblerjes për të cilën eshtë shprehur qartësisht Bundestagu; dosja po hidhet si në patate e nxehtë nga zyrat e prokurorisë sa në Dibër e në Tiranë megjithëse përgjegjës për të është qartazi SPAK-u”, është shprehur Hans-Joachim Falenski, këshilltar i grupit parlamentar CDU/CSU.
Sa i përket negociatave, në Bundestagun gjerman shprehën gatishmërinë për të dhënë vendim pozitiv për Shqipërinë, gjithsesi kjo nuk garantohet nga Holanda.
“Ne sugjerojmë që kolegët holandezë të mos votojnë kundra negociatave por, sipas shembullit të Bundestagut, të vendosin po të duan një kusht të dhjetë apo të njëmbëdhjetë”, tha Falenski.
E pranishme në Bundestagun gjerman në Berlin, ku mbajt konferenca për perspektivën europiane të Shqipërisë dhe Maqedonisë së Veriut ishte edhe Odeta Barbullushi, këshilltare e kryeministrit Edi Rama dhe ish-zv/ministre e Jashtme.
